Trabounan di arte cu mosaic na trapi di Rodgers Beach a keda desvela

ORANJESTAD – Dialuna atardi e trabounan di arte cu mosaic na trapi di RodgersBeach a keda desvela. Manera ta conoci e trapi a haya un renobacion completo cu a keda entrega na maart di e aña aki. Minister di turismo Dangui Oduber no a para eynan, ya cu su idea di comienso tabata pa haci esaki un atraccion pa nos turistanan. Un di mihor idea tabata pa haci obra di arte cu mosaic na e trapi. 

Pa haci e idea aki posibel a acerca e grupo di artista lidera pa sr. Tito Bolivar pa por realisa e proyecto aki. Desde 28 di october ultimo cu a anuncia e proyecto di mosaic na e trapi di Rodgers Beach, awe por bisa cu esaki a keda entrega. Un proyecto chikito pero cu sigur lo tin un balor agrega na nos producto Aruba. E ta un caminda pa nos localnan y turistanan saca un pic pa pone riba media social cu ta hopi na moda awor, esaki alaves lo sirbi pa mercadeo di Aruba como destinacion.

Mescos cu na Baby Beach e embeyecimento di Rodgers Beach tambe ta forma parti di henter e masterplan cu tin pa e area di Sero Colorado. Dentro di poco e fase 3 di e proyecto di Baby Beach caminda ta bay eleva henter e area rond di e playanan. Semper teniendo na cuenta e importancia di conserva nos naturalesa, creando asina un desaroyo di embeyesimento di e area na un manera sostenibel.

E proyecto di trapi a wordo financia door di Aruba Tourism Authority (ATA) y e lo eleva e producto Aruba como tambe haci Rodgers Beach mas accesibel pa esnan cu ta biba den bisindario.