Bogaerts determina pa hunga pa San Diego Padres pa resto di su carera

SAN DIEGO – E gerencia di e ekipo di baseball professional mericano San Diego Padres ta contento cu nan hungador nobo, e arubiano Xander Bogaerts. Esey tabata notable durante e conferencia di prensa di e ekipo diabierna ultimo unda cu a formalmente presenta Bogaerts y unda cu e la firma oficialmente cu e ekipo.  "Mi ta mira dilanti pa hunga aki pa e resto di mi carera!” Bogaerts a bisa despues di a caba firma su contracto nobo cu ta pag’e 280 miyon dollar mericano den 11 aña, cu ta e di 3 contract mas lucrativo firma e aña aki. E ta bisa esey mirando cu su edad, pa ora cu e termino pasa, e lo ta cla pa retira caba. E prome 10 aña di su carera a la dedica na Boston Red Sox, pero debi cu e ekipo no a sa di ofrece algo miho awor, e la haya un otro cu si tabata kier e pa loke e ta bal. Mirando e seleccion actual, ta bisto cu San Diego Padres ta cla pa tin e actitud d kier gana slamente y gana awor. Nan tin hungadornan di taya manera Manny Machado, Fernando Tatis JR y Ha-Seong Kim, djis pa menciona algun. Y nan tabatin un tremendo temporada y a hera yega pa ta e representante di Liga Nacional e aña aki. Mientras cu formalmente Padres no a presenta su plan defensivo pa 2023, nan por ta sigur cu Bogaerts lo cuminsa e temporada nobo na como e short stop, segun e gerente general A.J. Preller a sigura durante e conferencia di prensa. “Mi ta kere cu lo mi fit aden perfectamente” Bogaerts a sigui bisa. “Mas hungador di posicion bo tin di caliber halto y talent, miho. Manera tur hungador, nos ta laga nos ego na porta y ta bay pa un meta, esta purba gana e temporada!” Bogaerts a sigui bisa. “E ekipo aki di berdad kier gana, y bo ta wak con cerca nan ta” e la sigui bisa. “Specialmente mirando e weganan e ultimo temporada, mirando e fanaticonan, y wak con electrificante e tabata”, Bogaerts a finalisa bisando.