Sevinger: Ley cu ta prohibi persona bira parlamentario pasobra e ta sospechoso, ta mina democracia

ORANJESTAD – Si Parlamento presenta un concepto di ley cu e meta pa prohibi un Parlamentario di ta den funcion ora cu e keda marca como sospechoso di un investigacion, Benny Sevinger como parlamentario lo vota contra. Asina e parlamentario a bisa diahuebs anochi durante e programa NoticiaCla LIVE. Segun Sevinger, un echo asina ta impedi democracia di e forma ey. E kier men cu pueblo ta eligi e parlamentario ken su representante ta. Di otro banda, otro cos ta si bo ta minister y mester pasa screening. Pero den Parlamento ta pueblo ta dicidi ken ta su representante. “Na momento cu bo cuminsa na torno na e decision di pueblo, bo a cuminsa torno na bo democracia” Sevinger a sigui bisa. “Si bo no kier pa un parlamentario cu ta sospechoso of a crea duda, cu droga of arma, wordo eligi, e partido mester percura pa e no ta riba lista e ora ey. E partido mester screen e candidatonan ey” Sevinger a bisa. Ademas, e ta sugeri cu si e persona no tin partido mes y e bay eleccion como independiente y haya voto, e por drenta Parlamento. 

SACA BENNY

Segun Sevinger, e motivacion tras di un semejante ley ta pa parlamentarionan di coalicion, sak’e fo’i Parlamento. Pues como tal si tin un ley manera a keda sugeri, e lo vota contra. E no sa si, si e partido como grupo lo vota contra tambe.