Gobernantenan ta keto riba sentencia di aprobacion di matrimonio mesun sexo

ORANJESTAD – Un dia despues di e sentencia monumental di Corte dialuna unda cu tres hues a dicta cu matrimonio di mesun sexo ta posibel na Aruba y Corsou, gobierno di (por lo menos) Aruba ta keto keto. Noticiacla a haci intento pa un reaccion di e mandatarionan, pero te awor, tin un silencio riba esaki. Tanto prome minister Wever como minister di husticia Tjon no a reacciona ainda pa NoticiaCla. No ta conoci si nan ta formulando un contesta ainda, y cu tin cu duna nan e tempo pa asimila e cambio aki, por lo menos legalmente. Asina mes, e unico politico local cu a reacciona habri riba esaki, ta e lider di partido ACCION21, Miguel Mansur. E lider politico aki nunca a sconde e hecho durante e ultimo eleccion cu e ta e unico lider politico homosexual. Su contesta riba e sentencia ayera tabata corto pero claro, y a bisa solamente en corto, ‘porfin’ riba su pagina social. Mientras cu gobierno a keda keto (ainda) publicamente, e mester reacciona oficialmente dentro di e tempo stipula y wak si nan ta bay den casacion. Noticiacla a compronde cu e posibilidad pa esaki tuma lugar ta casi un hecho, mirando e pensamento for di comienso cu Aruba no ta bay ‘permiti’ e cambio di ley aki ‘ainda’. 

ENCUESTA NOTICIACLA

Segun e ultimo encuesta di Noticiacla riba e tema e aña aki ainda (juli), Aruba tabata dividi riba e tema di matrimonio di mesun sexo. Por lo menos entre e 850 personanan cu a participa den e encuesta. Y entre esnan cu tabata pro pa cambia e ley pa permiti matrimonio di mesun sexo, e grupo mas grandi kier pa esaki sosode pa medio di un referendum. Interesante ta cu den e encuesta aki, e participacion di hende muher tabata mas cu e ser masculino, reparti 54% contra 46%. Un 1% tabata registra como ‘otro’. 

E TEMA

E pregunta haci principalmente, tabata a raiz di e echo cu dos parlamentario di dos diferente partido politico (ACCION21 y RAIZ) a entrega y cofirma e concepto di ley pa permiti matrimonio di mesun sexo na Aruba e tempo ey. Y noticiacla tabata kier a sa a base di esaki, kico esnan cu a participa na e encuesta, tabata pensa. Esta si mester cambia e ley of no, siendo cu ya caba tin ‘geregistreerd partnerschap’, osea union civil. Entre esnan cu a participa, 51% a bisa cu mester cambia e ley, mientras cu 49% ta bisa cu no.

GOBIERNO

Un di e motibonan cu semper gobiernonan di turno a argumenta como un base firme contra matrimonio di mesun sexo, ta religion. Y den e caso specifico aki, cu ta sali di e punto di bista cu 95% di nos poblacion ta katolico y cu esaki lo no ta permiti matrimonio di mesun sexo. Loke ta hala atencion sinembargo den e sentencia di ayera ta cu a dedica tempo tambe na e aspecto religioso. Den e caso aki, articulo 2.50 di e sentencia ta trata e tema aki. Segun e sentencia, “e obhecion di contrincantenan di matrimonio di mensun sexo tin un fundament religioso” e parti aki ta cumnsa na bisa. “ E libertad di religion mester wordo salvaguardia” e ta sigui bisa. Sinembargo, e mesun sentencia ta bisa tambe cu “ e libertad di religion den un estado democratico no ta bay asina leu cu hende por impone nan norma y balornan propio religioso riba un otro”. Pues no por impone pensamento riba otro sin mas, incluyendo den e caso aki, nan obhecion contra matrimonio di mesun sexo. “Contrincantenan di matrimonio di mesun sexo, cu awor ta wordo permiti, no ta wordo kita di nan derecho pa casa cu e persona di nan escogencia”. Pues uno no ta stroba e otro. Cu esaki, e peso religioso ta haya un otro puesto, segun corte y no por pisa mas cu otro.