A kita titulo di Miss Bolivia pa a haci comentario ofensivo e.o. contra representante di Aruba

LA PAZ- Despues cu noticiacla siman pasa a bin cu e primicia riba e problema cu e representante di e pais boliviano Maria Fernanda Pavisic a haya sum es aden door di comentarionan deningrante contra e.o. representante di miss universe pa Aruba y otro paisnan, a bira conoci cu Pavisic a perde su derecho pa representa Bolivia otro aña januari den e certamen Miss Universo 2023. Asina e portal boliviano Los Tiempos ta confirma dialuna. Esta cu a kita e titulo di Pavisic. Ta considera cu debi na e accionan di Pavisic, e la viola e contracto cu e tabatin pa cu e representacion di su pais. Door di cu e la perde su titulo di miss Bolivia, e no por representa e pais ey mas.  

PROBLEMA

Tabata siman pasa ainda cu noticiacla a raporta cu e representante di certamen di Miss Universo 2023 pa Bolivia, e tempo ey ainda, Pavisic tabata den problema pa un video cu e la lansa cu lo ta racista y discriminatorio, y dirigi na rivalnan participante di e certamen, incluyendo Aruba. E portal Daily Mall a raporta cu e representante di 23 aña a wordo demanda pa e comentarionan haci den e video. E oficina di alcalde di ciudad di Potosi a entrega un demand acusando e reina di rasismo y discriminacion. E intencion tabata pa logra kita su titulo, pa e  no por participa y representa Bolivia durante e certamen dia 4 di januari 2023 na Nueva Orleans, estado di Louisiana na Merca.  E representante di Aruba ta Kiara Arends, cu a keda corona durante un certamen na augustus di e aña aki. 

E OFENSA

Miss Bolivia den e video ta yama representante di Aruba, Ecuador, y Corsou como esnan cu ta participa den e categoria di ‘danki pa a participa’, osea cu nan ta participa pa ‘respet’ pero no cu nan tin chens alguno. E ta sigui pa yama e participantenan di Paraguay, Brazil, y Miss El Salvador  como muhernan bieu. E comentarionan contra Venezuela, Peru y Argentina tabata considera como esnan mas ofensivo. E ta yama esnan di Venezuela y Peru como transexual y miss Argentina como miss Potosi, considera como un insult pa e damanan di e ciudad ey. 

DESPENSA

Pavisic a ofrece un despensa pero e gobierno di Potosi no a acepta esaki. Segun Pavisic, loke e la haci tabata un experiment social cu ta mustra cu usuario di rednan social tin un tendencia di comparti contenido mira como negativo so, envez di esnan positivo.