BCA a dicidi pa mantene e reserva obligatorio di Aruba na 24,0 porciento

BCA a dicidi pa mantene e reserva obligatorio di Aruba na 24,0 porciento

Posted on 11/29/2022 10:03 am AST | Updated on 11/29/2022 10:13 am AST

ORANJESTAD - Conforme e tarea di e Comite di Maneho Monetario (CMM) pa evalua, determina y duna transparencia riba e accionnan di maneho monetario di Banco Central di Aruba (BCA), BCA ta comunica lo siguiente. Durante e reunion di 12 di oktober 2022, CMM a dicidi pa mantene e reserva obligatorio na 24,0 porciento entrante 1 di november 2022. Di e manera aki, e banconan comercial mester tene un balansa minimal na BCA cu ta igual na 24,0 porciento di e depositonan riba termino cortico di nan clientenan. E decision pa mantene e reserva obligatorio na 24 porciento ta basa primordialmente riba e bahada continuo den e nivel di likides excesivo na e banconan comercial, ademas di un nivel adecua di reservanan stranhero persistente. 

E CMM a considera e siguiente informacion y analisis den su deliberacion:

RESERVANAN INTERNACIONAL Y OFICIAL

E reservanan internacional, cu ta consisti di reservanan oficial di BCA y reservanan di divisa na e banconan comercial, a subi cu Afl. 140,3 miyon (Grafico 1) riba 23 di september 2022, compara cu fin di december 2021. E reservanan oficial a aumenta cu Afl. 64,6 miyon, mientras cu e reservanan teni pa banconan comercial a subi cu Afl. 75,7 miyon. Consecuentemente, riba 23 di september 2022, e reservanan oficial y internacional a suma Afl. 2.809,5 miyon y Afl. 3.269,9 miyon, respectivamente. Pa e resto di 2022, BCA ta premira mas expansion den e reservanan oficial y internacional debi na extra entrada di divisa relata na turismo y un subida den inversion procedente di exterior.

Sostene un nivel adecua di reservanan ta critico pa mantene e tasa di cambio fiho entre e florin Arubano y e dollar Mericano. Teniendo cuenta cu esaki, BCA ta anticipa cu e reservanan internacional lo keda ampliamente riba e tres luna di pago riba e cuenta coriente di e balansa di pago. E pagonan riba e cuenta coriente di e balansa di pago ta consisti, entre otro, di pagonan pa importacion, pagonan di interes na inversionistanan stranhero y transferencianan pa exterior manera placa manda afo door di trahadonan stranhero. Ta proyecta cu e reservanan oficial lo keda dentro di e margen aceptabel basa riba e metrico ‘Assesing Reserve Adequacy’ (ARA) di e Fondo Monetario Internacional (FMI) (Tabel 1). 

 

INFLACION

Na augustus 2022, e Indice di Prijs di Consumo (IPC) a subi cu 7,7 porciento compara cu e mesun luna di e aña anterior (Grafico 2). E aumento aki den e IPC compara cu e mesun luna di e aña anterior tabata causa door di e crecemento den prijs di utilidad, cu a afecta e componente di ‘vivienda’ (contribuyendo cu 2,6 punto di porcentahe). Ademas, un subida den prijs di gasoline a influencia e componente di ‘transporte’ (contribuyendo cu 2,4 punto di porcentahe). Otro subidanan notabel a wordo registra den e categorianan di ‘cuminda y bebida no alcoholico’ (contribuyendo cu 1,3 punto di porcentahe) y ‘operacion di vivienda’ (contribuyendo cu 0,8 punto di porcentahe).

 

E inflacion midi riba promedio di 12 luna a crece te na 4,3 porciento. BCA ta proyecta cu e preshon inflacionario lo persisti durante e resto di 2022. E expectativa aki ta basa riba e nivel eleva di prijs di petroleo riba mercadonan internacional y ahustenan recien den prijs di awa y coriente. Ademas, Aruba ta importa un gran parti di e aumentonan den prijs for di su partnernan di exportacion, particularmente for di Estados Unidos y Europa. 

Mientrastanto, na augustus 2022, inflacion basico (excluyendo cuminda y energia) a alcansa 2,6 porciento si midi e final di respectivo luna contra e mes un luna di e aña anterior. Inflacion basico midi na final di e respectivo luna contra e mesun luna di e aña anterior a wordo primordialmente causa pa e componentenan di ‘transporte’ (contribuyendo cu 1,0 punto di porcentahe) y ‘operacion di vivienda’ (contribuyendo cu 0,8 punto di porcentahe). Basa riba un promedio anual, inflacion basico a yega na 1,9 porciento.

LIKIDES EXCESIVO NA  BANCONAN COMERCIAL

E total di likides excesivo na e banconan comercial a baha di Afl. 1.1320,5 miyon na december 2021 te na Afl. 800,7 miyon na augustus 2022 (Grafico 3). E caida aki den likides excesivo ta debi principalmente na e subidanan consecutivo den e tasa di reserva obligatorio durante januari 2022 pa juli 2022. Na augustus 2022, likides excesivo a sigui baha. No obstante, e nivel di likides excesivo a keda mas halto cu e nivelnan midi prome cu e pandemia na februari 2020 (+Afl. 111,6 miyon). E nivel halto di likides excesivo tabata a causa di e nivel eleva di depositonan teni  na banconan comercial, empuha tambe door di e nivel abou di demanda pa credito. E nivel halto di depositonan ta probablemente relata na e recuperacion den e sector di turismo. Sinembargo, ta premira cu Gobierno di Aruba lo financia e deficit den su presupuesto riba mercado local. Tambe, ta anticipa cu financiamento relata na e sector hotelero lo subi durante e resto di 2022. E circumstancianan aki lo por pusha e likides excesivo di e banconan comercial abou. 

 

 

 

 

 

  • Powered by SETAR