Peaton den caso hit & run ta e di 12 morto den trafico pa 2022

Peaton den caso hit & run ta e di 12 morto den trafico pa 2022

Posted on 11/27/2022 9:54 am AST | Updated on 11/27/2022 9:59 am AST

ORANJESTAD. - Diadomingo mainta pa 6:55 am, Central di polis a wordo notifica cu tin un persona benta abao cu sla na curpa na linear park na altura di Aruba Surfside Marine.

A despacha patruya pa e sitio y a manda ambulance tambe na e sitio di e sucedido.

Na yegada di patruya por a constata cu un señora tabata benta na suela y su situacion grave. E prome informacion tabata cu e señora a wordo alcansa pa un vehiculo di motor y e chauffeur a sigui core bay lagando e señora gravemente herida atras. Esaki ta un acto castigabel pa ley. Ambulance a yega na e sitio y personal di ambulance a asisti e señora y bay abao cune cu maximo urgenca pa hospital.

Lamentablemente na yegada di ambulance na hospital , e señora a fayece.

Pa 7:49 dokter ta constata morto di Ana Rosa Montaño Martinez naci 16-02-1962 (60 aña) na Republica Dominicana.

A pidi specialista di trafico como tambe polis technico na e sitio pa haci nan investigacion.

Cuerpo policial ta haci un apelacion, si un persona por a wak algo of sa algo pa yama e tiplijn di polis cu ta 11141.

NoticiaCla y Cuerpo Policial Aruba ta manda palabra di condolencia na famia di e fayecido.

Caso ta bao investigacion

  • Powered by SETAR