Oduber: Situacion positivo financiero e.o. pa AZV a duna espacio pa para recorte pa un luna

ORANJESTAD – Debi na varios factor positivo e aña aki incluyendo mas entrada pa AZV, enberdad minister di salud Dangui Oduber a duna instruccion na AZV pa para e recorte di 5.5% pa dunadornan di cuido pa December 2022. E mandatario despues a confirma e primicia di noticiacla diahuebs atardi den forma di exclusividad. Tabata e portal aki cu inicialmente tabata e prome y unico pa raporta riba e part aki diahuebs merdia.

PAKICO AWO?

Segun splicacion di e mandatario na e portal aki, e aña aki ta uno excepcional pa nos economia. “Aruba su turismo a demostra un resiliencia enorme pa ta e di dos pais den henter mundo oa experencia un recuperacion asina exitoso. Danki na e exit strategy y un strategia agresivo di pandemia a pone cu Aruba lo recupera 100% di su turismo e anja aki den comparacion cu anja 2019” e mandatario a cuminsa bisa.

RECUPERACION EXITOSO

“ Danki na e recuperacion exitoso aki tin un recuperacion economico mihor cu a anticipa. Esaki a conduci na mas entrada pa AZV debi na un aumento di prima azv y tambe e impuesto indirecto di BAZV. Consequentemente tin un espacio financiero pa por acomoda e dunadornan di cuido en todo caso pa luna di december 2022 di kita e recorte di 5.5% pa e luna di december 2022” e mandatario a continua bisando. “A base di esaki como minister di salud a duna e instruccion na AZV pa luna di december para e recorte aki” e mandatario a finalisa bisando. E mandatario ta bisa di ta hopi gradicido na nan trabounan y cooperacion. “Loke nos ta explorando awor aki hunto cu AZV ta pa evalua ki espacio lo tin pa anja 2023” e mandatario a bisa, splicando cu lo wak e ora si tin mas paro di recorte cu por sigui.

PROBLEMA CU HULANDA

Riba e aspecto di Hulanda, noticiacla a puntra e mandatario si no ta bay haya problema cu Hulanda pa a dicidi di para e recorte mientras cu e recorte tabata un di e rekisito di Hulanda. Riba esaki, e mandatario a splica cu gobierno a presenta un plan di reformanan structural cumpliendo asina tambe cu loke a acorda den landspakket. “Hulanda semper a lague na Aruba con ta duna invulling pa e reformanan” e mandatario a finalisa bisando e portal aki.