FIFA ta prohibi benta di cerbez den stadionan di Copa Mundial di Futbol na Qatar

DOHA – E fanaticonan di futbol na Qatar lo no por bebe cerbez den stadionan unda cu tin wega di Copa Mundial di Futbol cuminsando otro siman. E benta a keda prohibit, despues di un discusion entre FIFA cu autoridadnan di e pais anfitrion. Asina FIFA ta informa diabierna. E mundial ta cuminsa diadomingo awor. Cerbez no alcoholic si ta permisibel pa benta. Otro lugarnan cu no ta stadionan, por bende cerbez si. E ta un sla pa e compania di cerbez Budweiser cu ta patrosina e mundial aki. E compania madre AB InBev ta paga miyones di dollar pa cada mundial pa derecho exclusivo pa benta di cerbez. Ta un cooperacion cu FIFA cu a inicia for di 1986. Mientras cu e ta un sla, e compania a mustra comprension pa e noticia.