Fiscal: Ta imposibel kere cu Sevinger no tabata sa ken y kico tabata motibo pa terenonan erfpacht

ORANJESTAD – “ Si nos mester kere (ex minister Benny) Sevinger, su periodo completo como minister tabatacubri pa un neblina. Asina fiscal a describi e sospechoso principal diahuebs durante e rekisitorio pa e caso penal Avestruz. “E tabata firma documento si, pero no tabatin un idea ken tabata su tras. (Pero) esey Ministerio Publico no ta kere, ta haye absolutamente no probable y ta wordo contradeci den e dossier” e fiscal a cuminsa na bisa, den un intento di desbarata e supuesto inosencia di e ex mandatario (y e personanan cu e lo a yuda haya tereno:red).

NO POR KERE SEVINGER

“Segun Sevinger su palabra, te cu su interogacion cerca Landsrecherche na 2021, e no tabata sa ken tabata tras di e peticionan” e fiscal a continua bisando den un tono sarcastico. “Leoncita Arends? Sevinger no tabatin un idea (cu e tabata kier tereno y pakico). Esaki mientras cu e sospechoso Every (hefe di oficina di Sevinger) un par siman atras ainda durante e caso mes a declara cu e la papia varios biaha cu Arends riba e peticionan aki” e fiscal a sigui bisa, sugeriendo asina pakico ta dificil pa kere declaracion di Sevinger. 

PRUEBA

Segun fiscal, tin suficiente prueba pa contradeci Sevinger su ponencianan. Entre cantidad di yamada entre e partidonan, te na potretnan riba cual por mira Sevinger y Arends riba vacantie na New York. “Testigo Hsing, secretaria di Sevinger, a declara tambe cu Arends tabata bishita Sevinger na oficina”.  Y asina e tabata nombra varios cos cu tabata contradeci Sevinger, segun e fiscal.

SUSSEBEEK

E fiscal a sigui riba e amigo Sussebeek cu lo tabata e consehero politico di Sevinger, y amigo di 20 aña cu e tabata core bicicleta cu ne. “Sussebeek y Sevinger tabata discuti varios caso cu otro. Specificamente, desaroyo di tereno. E unico desaroyo di tereno sinembargo cu Susebeek tabata haci, ta esnan cu e la haya  cu derecho di erfpacht otorga pa Sevinger” e fiscal a sigui bisa. “Hustamente  den e periodo cu Sussebeek y Sevinger tabata wak otro asina hopi”.  Segun fiscal pesey ta totalmente no creible cu Sevinger ningun momento tabata na altura cu ta Sussebeek tabata tras di varios di e peticionan aki” e fiscal a sigui bisa, pintando un cuadro di cu ta dificil pa kere e ponencia di e tres sospechosonan aki, Arends, Sevinger y Sussebeek. Esaki ta apenas parti chikito di e rekisitorio.