Durante dos diferente entrada hudicial, polis a detene 2 persona cu arma di candela

SAN NICOLAS – En conexion cu diferente casonan di kiebro ( Modus operandi drenta via dak)  y otro casonan mas cu ainda ta wordo investiga, recherche di San Nicolas (DAR3) diahuebs mainta a haci un entrada hudicial na un cas na Essoheights y akinan a detene e hende homber: S.Q.K., naci na Aruba di 22 aña y na dicho cas a confisca un arma di candela.  Awe en conexion cu e mesun caso a haci un entrada hudicial na un cas na Bushiri y a detene e homber O.J.V.T.P. naci na Aruba di 23 aña.  Den e cas na Bushiri tambe a encontra un arma di candela y a confisca esaki. No ta descarta cu lo ta bay tin mas detencion. Pa Cuerpo Policial por resolve mas caso cooperacion y informacion di pueblo di Aruba ta hopi importante, pesey nos ta pidi si bo tin cualkier informacion yama e tiplijn di Polis cu ta 11141. Nos ta garantisa cu bo ta keda anonimo.