Minister ta admiti cu falta detaye pa cu e deal di HFO for di Ecuador pa Aruba

ORANJESTAD – Mientras cu minister di energia Glenbert Croes e siman aki a anuncia e logro cu lo baha prijs di compra di HfO door di cumpra esaki for di Ecuador, e siman aki e la admiti cu tin (hopi) pregunta cu ta keda pendiente ainda. NoticiaCla a haci cierto preguntanan specifico na e mandatario despues di su conferencia, pero e la informa cu e no por a contesta esaki ainda. E preguntanan haci, segun e mandatario na e portal aki, por haya contesta despues cu e team negoshador termina cu e negosacionan proximamente na Ecuador. 

PREGUNTANAN

E mandatario entre otro a anuncia cu awor, 50% di e HFo ta bin caba for di Ecuador. E pregunta cu e no por a contesta ainda di e portal aki, ta si cu e deal nobo, Aruba lo cumpra 100% di e HfO for di Ecuador. Tambe e mandatario a anuncia cu e prijs lo ta considerablemente mas barata. Pero kico exacto e prijs lo bira, y con mas barata esaki lo ta, e mandatario ainda no por a contesta. Pues esaki ta keda pendiente pa ora cu e team negoshador, caba cu nan trabou. 

E BISHITA

E mandatario a relata cu e la bay Ecuador pa logra haya interes di gobierno di e pais via e compania PetroEcuador, pa yuda Aruba pa baha e prijs di HfO pa asina Aruba beneficia di prijs mas barata y consecuenquentemente esaki traduci den tarifa mas barata di awa y coriente, pa e proximo 30 luna tanten ta warda pa e otro plan keda cla.