RMR: Aunke Aruba a logra e norma pa 2022, e forma no ta esun corecto si!

DEN HAAG – Aunke Aruba a logra e norma di prespuesto 2022 (na ultimo ora:Red), Conseho di Minister di Reino ta preocupa cu e situacion di Aruba. Asina RMR a informa secretario di estado hulandes Alexandra van Huffelen formalmente den un carta. “Bo lo informa gobierno di Aruba na nomber di RMR cu nos tin hopi preocupacion pa cu finanzas di Aruba” e carta ta bisa textualmente. Y mas ainda pasobra aunke cu Aruba a cumpli cu e norma, technicamente, esaki no ta e forma pa hacie. Aruba a logra e norma danki na ‘entradanan incidental’. Y esaki ta un problema pa Hulanda. “Mirando e forma con e norma a wordo logra, nos kier bo enfatisa (e implementacion di) medidanan structural pa cu presupuesto 2023, y e prioridad pa e discusion riba e Rijkswet Aruba Financieel Toezicht”, e carta ta sigui bisa. Aruba no ta contento cu e RAFT actualmente y ta tardando e proceso pa complementa e parti aki, cu ta un di e condicionan cu Aruba a haya pa por a ricibi sosten di likides. 

NO TIN CHENS MAS

“Manera cu e situacion ta aworaki, no tin sistema mas cu e norma dynamico cu por permiti un deficit financiero, pues Aruba mester realisa un surplus di 1%”. Gobierno di Aruba a bisa awor, cu nan ta trahando duro pa logra esaki, y a menciona cu a yega caba na un deficit minimal, bayendo pa un surplus pa 2023. Problema ta cu Hulanda no kier pa ‘na caminda’ e presupuesto keda adapta atrobe, sino cu e mester keda haci awor pa e por wordo aproba na tempo, esta prome cu final di 2022. 

NO A USA E ZIENSWIJZE

Un otro punto importante ta cu RMR a informa cu mirando cu Aruba a logra e norma, e defensa di Aruba contra e posibel aanwijzing (zienswijze) no a wordo trata mes. “Loke ta wordo menciona si ta cu bo no ta acepta (e contenido:red) di e zienswijze”. Cu esaki ta mustra cu Hulanda no ta acepta e splicacion di Aruba pa cu e menasa di e aanwijzing. Lesa e 'beslisnota' di RMR AKI.