Gobernador a huramenta Ady Thijsen como minister plenipotenciario na Hulanda

ORANJESTAD – Diahuebs mainta Gobernador di Aruba Alfonson Boekhoudt a huramenta Ady Thijsen como minister plenipotenciario na Hulanda. Manera cu e portal aki a raporta caba, tabata durante conferencia di prensa di Gobierno di Aruba, cu Prome Minister Evelyn Wever-Croes a anuncia cu señor Ady Thijsen lo a huramenta dilanti gobernador como Minister Plenipotenciario na Hulanda diabuebs mainta. 

CONFIANSA

Prome Minister a expresa di tin pleno confiansa cu señor Thijsen lo ta di gran aporte pa representa Aruba na Hulanda specialmente na e reunionann di Minister di Conseho di Reino mirando cu e tin hopi experiencia como politico y gran concocemento den tereno di husticia y principalmente di Aruba su constitucion. 

ENCARGO

Señor Thijsen tambe lo ta encarga hunto cu e directora interino di Arubahuis pa trece cambionan fundamental na Arubahuis na Hulanda. Señor Thijsen lo eherce dos funcion, cu ta e funcion di Minister Plenipotenciario na Den Haag y e funcion di representa Aruba na Union Europeo. Prome Minister tambe a enfatisa riba e hecho cu señor Thijsen lo ricibi solamente un salario pa eherce e dos funcionnan aki, mirando cu tin rumores caba ta circulando cu e lo ricibi dos salario. Esaki sigur no ta e caso ya cu señor Thijsen lo haya e salario di Gevolmachtigde Minister y cu esaki e lo eherce dos trabou. Esaki sigur ta parti di Gabinete Wever-Croes su esfuerso pa contribui na baha gastonan structural den gobernacion.