Prome Minister Wever a participa na Asamblea General di OEA na Peru

LIMA - Durante e programa di e asamblea general di e Organización de los Estados Americanos (OEA), cu e siman aki ta tumando luga na Lima Peru, Prome Minister Evelyn Wever-Croes, como Prome Minister di Aruba y como parti di Reino Hulandes, a haya e oportuntidad pa participa como orador den e forum tocante e liderazgo de hende muhe den politica internacional pa combati e desigualdad y e descriminacion di hende muher. Un dialogo di nivel halto cu e Ministernan femenino di Relacionnan Exterior di America.

Durante e dialogo, e.o. prome minister Wever a remarca cu ta tristo pa sa cu desigualdad entre hende homber y hende muher ta aumentando na mundo, y nos region ta afecta fuertemente pa e desigualdad aki. Tin indicenan hopi halto di desigualdad den nos region cu ta afecta directamente e bienestar di tur. Datanan alarmante di temanan di femicidio y violencia contra hende muhe ta un prueba di e indece halto di desigualdad. 

E la sigura cu Gobierno di Aruba y Reino Hulandes ta reconoce e urgencia pa redobla esfuersonan pa loke ta trata igualdad di genero. Mientras cu desigualdad di genero ta empeorando riba nivel mundial, violencia contra hende muhe y mucha muhe ta aumentando y trahadonan den e sector informal, kendenan mayoria ta hende muhe, ta esnan cu ta wordo mas afecta economicamente.