Xander Bogaerts a termina temporada cu Boston sin claridad pa su futuro

BOSTON – E pelotero professional di Aruba Xander Bogaerts a termina su temporada 2022 diaranson anochi na cas (Boston) cu un ‘standing ovation’ ora cu e manager Alex Cora a sak’e for di wega den di 7 inning. Esey a permiti’e pa henter stadion dun’e e homenahe ey, pero sin un siguransa cu e lo ta bek cu e ekipo cu e la cuminsa su carera professional (Boston Red Sox) algun aña pasa. Asina cu e wega # 162 di temporada a caba, e pregunta a cuminsa cerca e comentaristanan (y resto di mundo), kico ta pasa awor cu Bogaerts. 

DIFICIL

Bogaerts mes a purba contesta e preguntanan ey miho cu ta posibel. Un cos cu e la confirma ta cu esaki tabata un temporada hopi dificil p’e pa e motibo ey. E presion di su futuro, a pisa hopi y awor e kier bay cas. “Esey mi kier awor, bay cas”, Bogaerts a bisa, indicando cu e ta bay Aruba bek awor y e ora e proceso ta cuminsa pa determina kico ta pasa cu su futuro, esta si e ta bolbe e temporada siguiente cu uniform di Red Sox of e ta cambia di ekipo. Si ta pa Bogaerts, e ta keda, y si ta pa e manager tambe. Pero tin mas factor den wega. Na comienso di e temporada, Bogaerts a nenga e oferta cu a hacie pasobra e ta haya cu e merece mas. Y a dicidi cu ta sigui e tema di contract despues cu e temporada aki caba. E ta bira un agente liber awor cu chens pa cambia di ekipo. E temporada aki Boston tin cu pag’e 20 miyon dollar conforme su contract. Tin varios ekipo cu tin wowo riba dje, entre nan New York Yankees y St Louis Cardinals. Ambos ta ekiponan poderoso cu cual Bogaerts por yega leu. Tempo lo bisa, kico ta pasa cu Bogaerts.