Deaxo Croes ta landa diasabra di Arashi pa Baby Beach, preparando pa ‘Crossing for Prevention’

Posted on 09/29/2022 3:29 pm AST | Updated on 09/29/2022 3:37 pm AST

ORANJESTAD – Deaxo Croes, atleta Arubiano cu ta pronto lo realisa e hazaña di Crossing for Prevention, tin un antesala prepara pa e siman aki cu yama Punta pa Punta. Diasabra awo, 1 di october, e ta landa for di Arashi pa Baby Beach. Deaxo ta entrenando hopi duro y ta totalmente enfoca pa completa e trayecto di mas o menos 34 kilometer stret.

Relaciona cu esaki, e ekipo tras di Crossing for Prevention ta anuncia cu lo tin varios punto for di unda sostenedor y publico por bin wak y apoya mientras cu Deaxo ta den accion. Ta importante pa keda pendiente di e pagina di Facebook Crossing for Prevention caminda ta bay publica e luga exacto y ora cu ta yegando na cada un di e puntonan. Deaxo mes lo cuminsa landa entre 2’or pa 3’or di diasabra marduga y ta calcula cu lo yega Baby Beach prome cu solo baha.

Na mesun momento ta haci un invitacion na tur landando cu ta desea pa join Deaxo den e area Mangel Halto y landa hunto cu ne e parti aki di e ruta. Ta enfatisa cu compaña Deaxo den awa ta posibel solamente na Mangel Halto y ningun caminda prome of despues pa motibo di siguridad.

Crossing for Prevention mes ta tuma luga dia 19 di November 2022. Esey ta e fecha riba cual Deaxo lo landa for di Boneiro pa Corsou den un hazaña fisico cu ningun otro persona a yega di haci. E obhetivo di e iniciativa aki ta recauda fondo pa fundacion na e islanan ABC cu ta dedica nan mes na e prevencion di cancer. Ta trata di Fundacion CORESA Aruba, Kanker Fonds Bonaire y Caribbean Prevention Center Curacao.

Pero no mester warda diasabra awo, ni dia 19 di november pa cuminsa yuda. Ya caba por bishita www.crossingforprevention.com y contribui facilmente door di click riba e boton oraño cu e palabra ‘sponsorship’. Cada florin cu ta aporta ta bay directamente na e logistica di Crossing for Prevention.

Ta desea Deaxo Croes hopi exito den Punta pa Punta y ta yama danki na un y tur cu ta aportando, di un manera of otro, na haci Crossing for Prevention un realidad.  

  • ESPN: Xander Bogaerts ta firma cu San Diego Padres pa 280 miyon dollar!

    ESPN: Xander Bogaerts ta firma cu San Diego Padres pa 280 miyon dollar!

    SAN DIEGO – E pelotero professional di Aruba Xander Bogaerts a bay di acuerdo pa firma un contracto cu e ekipo di San Diego Padres. E contracto ta balora na 280 miyon dollar pa 11 aña. Asina e portal deportivo ESPN ta raporta. Padres a purba haya Aaron Judge y Trea Turner pero awor a redirigi nan placa pa un mega deal pa Bogaerts. Segun e relato, e ta mas cu cualkier persona lo a proyecta cu e infielder lo a gana. Pero ta parce cu e presidente di operacion A. Preller lo no a permiti pa nan ‘outbid’ e e biaha aki. E plan ta pa Bogaerts cuminsa cu Padres na 2023, y unda cu ta manda Fernando Tatis Jr pa outfield.  Bogaerts tabata na Phoenix pa e wega di NBA entre Suns y Celtics, y ta na San Diego diabierna pa e test fisico pa finalisa e deal mes. 

  • MLB: Boston Red Sox ta firma yiu di Corsou Kenley Jansen pa 2 aña

    MLB: Boston Red Sox ta firma yiu di Corsou Kenley Jansen pa 2 aña

    BOSTON – E ekipo di baseball professional mericano Boston Red Sox a firma e yiu di Corsou Kenley Jansen pa un contracto di 2 aña balora na 32 miyon dollar diaranson. E club mes no a confirma e noticia, pero MLB ta papia di esaki riba nan portal. Jansen tabata cu Atlanta Braves den e temporada pasa, y a bandona Dodgers despues di 12 aña. 

  • Cristiano Ronaldo ta riba banki pa wega Portugal contra Suiza

    Cristiano Ronaldo ta riba banki pa wega Portugal contra Suiza

    LUSAIL - Cristiano Ronaldo lo no ta activo den e seleccion di Portugal diamars contra Suiza den mundial di Qatar 2022. E dirigente Fernando Santos ta castiga Ronaldo asina pa su comportacion despues di e ultimo wega contra Sur Korea ora cu Ronaldo tabata irita pasobra a sak’e di wega despues di 65 minuut. E reemplazante ta Conçalo Ramos (21).   

  • Morocco ta sorprende y ta manda Spaña cas via penalty durante Mundial di Qatar 2022

    Morocco ta sorprende y ta manda Spaña cas via penalty durante Mundial di Qatar 2022

    DOHA – Den un sorpresa grandi atrobe durante e weganan di mundial di futbol na Qatar, Morocco a elimina Spaña y pasa pa cuarto di final diamars ganando tirando penalty.  Despues di e wega reglamentario di 90 minuut y extra tempo pa total di 120 minuut, e score ainda tabata 0-0. Como tal mester a bay pa tiramento di penalty. Spaña a faya tur penalty y Morocco si a logra hinca 3. Asina Morocco ta clasifica pa prome biaha den historia di mundial pa e cuarto di final. 

  • Aruba hayando atencion internacional danki na cobertura pa futbolista hulandes Denzel Dumfries

    Aruba hayando atencion internacional danki na cobertura pa futbolista hulandes Denzel Dumfries

    DOHA – E siman aki a habri cu hopi cobertura ‘indirecto’ y directo pa e isla di Aruba, danki na e atencion cu e hungador di futbol pa seleccion di Hulanda na mundial di Qatar 2022, Denzel Dumfries ta hayando riba su mes. Specialmente despues di su prestacion diasabra durante e wega entre Hulanda y Merca durante e mundial, unda cu Dumfries a asisti dos biaha pa anotacion y finalmente e mes anota e di tres goal di e partido di Hulanda contra Merca. Noticiacla a conta por lo menos 10 pa 15 recorte periodistico internacional unda cu Dumfries ta haya atencion particular y mencion, y cu ne e hecho di su lasonan cu Aruba, sea ta pa su participacion breve den e seleccion di Aruba hopi aña pasa y pa e hecho cu un di su mayornan cu ta di Aruba. Pero hasta prome cu e weekend aki, durante tur e weganan cu Hulanda a hunga, por a scucha comentaristanan internacional haci mencion di  Dumfries y relate mesora cu ‘pais Aruba’. 

  • E prome coaching clinic di USA Baseball a tuma lugar na Aruba

    E prome coaching clinic di USA Baseball a tuma lugar na Aruba

    ORANJESTAD - Den e weekend di 2-3 y 4 di december tras di lomba a tuma lugar e prome coaching clinic di USA Baseball na Aruba. Un weekend dedica na mehora e deporte di baseball na nos isla. Ariba diabierna atardi a tuma lugar e meet and greet na Local Store permitiendo e coachnan local sera conoci mas di serca y combersa cu e coachnan di USA Baseball. Den un ambiente ameno a presenta e cuater coachnan y asina kick-off e evento.

  • Powered by SETAR