Gobierno a reuni cu secretario di estado van der Burg riba reapertura di frontera cu Venezuela

ORANJESTAD – Gobierno di Aruba a trata e tema di reapertura di frontera cu Venezuela diamars cu secretario di estado hulandes Eric van der Burg, cu tin e cartera di Husticia y Siguridad. Ministernan Rocco Tjon, Evelyn Wever-Croes y Glenbert Croes a reuni cu e mandatario hulandes,  mirando cu e topico di estranheria ta toca diferente faceta, y ta resorta bou di diferente Ministerionan a scoge pa  reuni den e constelacion aki. 

REAPERTURA FRONTERA

E reapertura di e frontera cu Venezuela, mester bisa cu ambos Gobierno di Aruba como Hulanda ta consciente cu esaki lo wordo habri eventualmente, sin mas, e siguridad di nos frontera y e siguridad riba nos isla ta keda un prioridad. Pues den cuadro di esaki, e “justitieel veiligheidsberaad” ta evaluando e impacto cu esaki lo por tin pa nos isla den cuadro di asilo y siguridad en general, pues ta un topico cu mester wordo miho evalua pa asina bin cu un plan di maneho pa por realisa esaki na su debido tempo. 

BESTEDINGSPLA

A toca tambe e “bestedingsplan” di e cadena di estranheria, e reapertura di frontera cu Venezuela y posibel colaboracionnan pa futuro. Un reunion sumamente positivo caminda a dialoga riba e cooperacion cu ta hayando di parti di hulanda den cuadro di asilo, aspectonan di migracion y inmigracion pa loke ta control di nos frontera.

DETENCION DI DETENIDO

Por ultimo, a toca tambe puntonan di posibel colaboracionnan pa e futuro cercano, y aki a papia di aspectonan di detencion y cuido forensico pa detenidonan, pero tambe aspecto pa haya ayudo tecnico riba e parti di asilo. Banda di esaki tambe a papia riba "mensenhandel en mensensmokkel” pues traficacion di hende, y a splica e retonan cu ta wordo confronta cune pa loke ta e TIP-report cu ta wordo emiti door di Merca.