Minister Wever: Cifranan di loke Aruba ta importa ta disponibel

ORANJESTAD - Minister di Asuntonan Economico mr. Geoffrey Wever a informa diamars cu Oficina Central di Estadistica a publica e ultimo infomacion di cifranan di importacion y exportacion. 

Aruba como economia chikito ta importa mayoria productonan cu cada un di nos ta cumpra den supermercado of tienda. Ta trata di entre otro productonan pa uzo diario manera cuminda y paña te material di construccion. E productonan ta yega Aruba via barconan o avionan di diferente paisnan y ta destina pa produccion y consumo local of Freezone.

Den luna di april te juni 2022, e balor di productonan importa a yega un total di di Afl. 605 miyon. Di e suma aki, Afl. 570 miyon ta destina pa produccion y consumo local y Alf. 35 miyon via Freezone pa exportacion. Tur productonan ta wordo categorisa den seccionan manera por ehempel productonan alimenticio. 

Un dato interesante ta cu e top 5 di berduranan mas importa segun nan balor den periodo april te juni 2022 ta:

-           Lechuga

-           Tomati

-           Batata (incluso batata dushi)

-           Promenton

-           Siboyo

Ministerio di Asuntonan Economico, Comunicacion y Desaroyo Sostenibel ta monitor continuamente desaroyo di importacion y exportacion di productonan y su impacto riba economia di Aruba.