AAA: Aeroliña Dominicano nobo lo conecta Aruba directamente cu Santo Domingo

ORANJESTAD - Arajet, un aerolinea Dominicano nobo di tarifa cu costo abou, recientemente a confirma cu tur Rubiano lo por cumpra ticket round-trip cu tur impuesto inclui. E tarifa ta basa riba vuelo directo desde Aruba pa Santo Domingo. Asina aeropuerto di Aruba ta raporta. Cu e compromiso aki, Arajet, ta busca pa conecta Aruba cu Santo Domingo y su diferente experiencianan turistico y comercial, pero tambe pa duna un impulso na e crecemento y desaroyo economico di ambos pais a traves di e promocion comercial y turistico di e dos paisnan tan importante den Caribe, cu tin un historia comun. E fundado y CEO di Arajet, Victor Pacheco, a garantisa cu “Sin duda, pa Arajet, Aruba ta un destinacion cu hopi interes, debi na e demanda di e biaheronan cu ta bay y bin pa Republica Dominicana. Nos kier ofrece e habitantenan di Aruba un alternativa di biahe cu ta accesibel den prijs y cu ta cumpli cu nan expectativa di biahe di menos costo, cu servicio di clase mundial y cu e avionnan di mas nobo y efeciente riba mercado.” Asina tambe ta anuncia cu e prome vuelo di regreso fo’i Santo Domingo pa Aruba lo ta diabierna 16 di september. Cu e apertura di e destinacion aki, Arajet, ta fortelece su presencia den Caribe y ta avansa den su strategia  di expansion, di cual nan ta spera di transporta shete miyon pasahero pa aña den un periodo di cinco aña.  Arajet lo yega Aruba cu un tarifa abou round-trip incluyendo impuesto, e ticketnan ta disponibel riba nan website www.arajet.com. Ademas, e aerolinea ta opera cu avion 737-MAX-8 completamente nobo, cu un capacidad pa 185 pasahero y ta priminti di e servicio renonoci mundialmente conoci di e Dominicanonan: “caluroso, amical y di un clase mundial”.