Wever Croes: Nombracion di Thijsen pa minister plenipoteciario ta den fase final

ORANJESTAD - Nombracion di señor Ady Thijsen como Minister Plenipotenciario na Hulanda ta den su fase final y pronto lo manda tur informacion pa Parlamento. Asina prome minister Evelyn Wever Croes a informa den un comunicado. Mester bisa cu e proceso a dura bastante largo, mirando cu for di januari sr Thijsen a bay Hulanda, y e ex minister plenipotenciario ta na Aruba for di mei caba, pues tabatin un tardansa basta grandi. E comunicado no ta bisa kico e motibo pa e tardansa ta. Segun Wever e ta sgura cu señor Thijsen ta e prome funcionario cu a pasa un screening segun e ley nobo di screening, e ley cu Parlamento a bin cu ne. Un ley, cu segun Prome Minister, mester wordo aplica pa Parlamentarionan tambe pa asina elimina e sospechosonan y esunnan riba blacklist di Merca for di e Parlamento. E ta un procedura di screening mas intenso y ta rekeri cu Prome Minister manda un reportahe di e screening pa Parlamento. Proximamente señor Ady Thijsen lo wordo huramenta door di Rey Willem Alexander na Hulanda.