Minister Slot y secretario di estado Van Huffelen na Corsou

WILLEMSTAD - Hanke Bruins Slot minister di asuntunan interior i relashonnan di reino i Alexandra van Huffelen sekretario di estado di asuntunan di reino i digitalisashon ta di bishita e siman aki na St. Maarten, St. Eustatius i Kòrsou. E bishita ta terminá djasabra 10 di sèptèmber esta mañan.

E bishita ta den kuadro di e pasado di sklabitut i pa nan mes por mira i skucha kiko ta e interesnan i e nifikashon di pasado di sklabitut riba e islanan pa ku Ulanda.

E bishita  a kuminsá djamars dia 6 na St. Maarten kaminda e dos mandatarionan a kombersá ku diferente habitante di e isla. Alabes a pone atenshon na 5 aña ku orkan Irma a pasa riba e isla.

Siguiente dia nan a bai St. Eustatius kaminda a kana keiru den Oranjestad i a papia ku e komishon di Statia Heritage i a bishita un skol i papia ku e hubentut relashoná ku pasado di sklabitut.

E mandatarionan a yega Kòrsou despues kaminda tin un programa amplio pa nan tuma parti na dje. Entre otro ayera nochi nan a bai kana den Seri Otrobanda kaminda e aktividat di Kaya Kaya a tuma lugá i nan a haña splikashon di entre otro artenan ku a forma parti di e ambiente.

Awe mainta tambe nan lo bishita un skol kaminda lo papia ku e alumnonan tambe ku e tema di sklabitut.

Riba enkargo di minister di BZK e Kolegio di Konseho, Grupo di Diálogo Pasado di Sklabitut, a duna un konseho riba e pregunta kon pa atendé ku e pasado di sklabitut i su impakto den presente. Gabinete lo bin ku un reakshon promé ku 2023 riba e konseho akí. Gabinete su meta ta un futuro kompartí, pa logra esei bo mester konosé bo pasado kompartí promé. Lo inkluí e eksperensianan durante e biahe akí tambe den e reakshon di gabinete.

Ta netamente den e kuadro aki e bishita i tur e kombersashonnan i interkambio ku e mandatarionan a tene riba e islanan. NOTA: E texto ta scirbi den Papiamento fonetico di Corsou.