AAA su Wings of Hope a organiza e prome SDG 6K Fun Walk & Run 2022

ORANJESTAD - Aruba Airport Authority N.V. (AAA) su Wings of Hope (WoH) a organisa e prome 6K Sustainable Development Goals (SDG) Awareness Fun Walk & Run riba Diasabra September 3, 2022. 

Un total di 211 participante a participa na e SDG Fun Walk & Run pa crea fondo pa Micky’s Foundation y Stichting Casa Cuna Progreseo y pa crea concientizacion riba e importancia di e Sustainable Development Goals di Nacionnan Uni. E dos fundacionnan a wordo escohi dor di AAA su empleadonan por medio di un poll. 

Micky’s Foundation ta brinda muchanan cu limitacionnan fisico y/of mental cu terapia specializa y intensivo na cas di famianan completamente gratis. Micky’s Foundation ta organisa proyecto nan pa 3 luna consecutivo 4 bes pa aña pa por garantiza e continuacion di terapia. Cada terapia ta wordo duna cu por lo menos un mayor di e mucha aserca pa asina e mayor tambe por duna e mucha terapia na cas. 

Stichting Casa Cuna Progreso ta un cas di mucha pa duna muchanan cu (temporalmente) no por biba na nan cas pa motibonan manera neglicencia, abuso sexual of abuso fisico. Stichting Casa Cuna Progreso tambe ta guia e mayornan e adultonan di crianza di e muchannan.  

Na final di e SDG 6K Fun Walk & Run, e participantenan por a disfruta di algo pa refresca incluyendo awa di coco cu e branding di Wings of Hope riba e coconan, fruta y tambe a ricibi un regalo como muestra di aprecio. Den presencia di tur participante, AAA Wings of Hope a presenta un donacion di AWG 5,000.00 na cada fundacion. Pa conclui e evento, un total di 29 premio a wordo parti entre e participantenan y a inclui gadgets electronico, certificado di shopnan deportivo, dinner vouchers y airfare vouchers.