APA: Ta inicia destaho publico pa desaroya Port City na November 2022

ORANJESTAD – Pa november 2022, Aruba Ports Authority lo inicia e proceso di destaho publico pa desaroyo di 184.000 m2 di tereno den un asina yama Port City, cu ta e espacio riba waf cu pa hopi aña no tabata desaroya. Asina gobierno di Aruba y Aruba Ports Authority NV a anuncia diamars mainta durante un conferencia di prensa.  E intencion ta pa desaroya 43% di e tereno aki den parti di real estate manera boutique hotels, area di retail y mas, combina cu un area di recreacion local y turistico, mientras cu e resto (57%) ta bira un area di naturalesa cu por wordo disfruta pa bshitantenan.   E intencion segun minister di turismo Dangui Oduber y director di APA Marc Figaroa ta pa construccion di e prome fase (area di Bushiri pa rotonde na Wendys Boulevard) cuminsa den e di dos cuartaal di 2023. 

E PROYECTO

Segun presentacion haci diamars mainta, e proyecto ta un idea cu ta data for di 1995 pero cu a haya mas forma na 2017 ora cu e gobierno di turno a pone esaki como un prioridad, pa despues den 2018, haya aprobacion di e plannan maestro pa conseho di minister. A splica cu e proyecto mester encamina 7 elemento, entre nan cu e mester bira e gateway pa turismo, desaroyo di scenic road y board walk, y mester ta un proyecto sostenibel. 

DESAROYO

A splica cu e proyecto aki lo tin un tempo di desaroyo di entre 15 pa 20 aña, reparti den varios fase, durante cual e por genera trabou na final na 3000 persona, y genera por lo menos 40 miyon di florin na entrada pa caha di Gobierno. E intencion ta pa otorga e terenonan na esnan cu gana e destaho, den forma di ‘ondererfpacht’, y lo tin cu paga 40% di e suma adelanta na APA. APA na su turno, lo inverti e entrada di placa ey na desaroyo di e infrastructura necesario riba e tereno en cuestion. A sigura cu e proyecto ta bira un inversion priva di 1 biyon florin na final, cu lo beneficia caha di gobierno sigur tambe. A splica tambe cu ora cu a haci e market consultation (sondea e mercado) na 2020, esaki a genera interes di mas di 70 compania internacional. Ta e intencion y pensamento cu esakinan lo ta interesa pa ora cu e destaho cuminsa na November di e aña aki, cu un biaha mas, e por genera e interes necesario. Unabez e destaho tuma lugar, un comision lo evalua esaki y otorga e respectivo terenonan na e ‘ganadornan’ cu e pensamento cu pa e di dos cuartal di 2023, por cuminsa cu e prome construccion.