Segun CAFt, tanten no tin un surplus, presupuesto di Aruba lo no cumpli cu norma di protocol

ORANJESTAD – E concepto di ley pa e presupuesto 2023 segun e colegio di supervision financiero pa Aruba CAFt no ta cumpli cu e norma di e protocol di LAFt, cu ta stipula cu pa 2023 mester tin un surplus di minimo 1%. Gobierno a haya un dispensacion di Hulanda pa 2020 y 2021, debi na pandemia pa cual no mester a cumpli cu e norma. E dispensacion awor a cambia, pa cual CAFt ta den lomba di GOA pa logra e norma. Den e prome conseho riba e concepto di ley, gobierno a entrega e presupuesto cu un deficit di 97 miyon. E colegio e momento ey a informa gobierno di Aruba (GOA) di e discrepancia ey y a duna 9 recomendacion pa remedia e situacion. E siman aki (ayera) GOA a entrega un concepto di ley nobo, cu e biaha aki un deficit di 25 miyon. 

GOBIERNO VS CAFt

Den su reaccion diahuebs, minister Xiomara Maduro a confirma cu CAFt a duna 9 recomendacion, cual gobierno a atende aunke no a specifica den ki forma a atende esaki. E ta bisa si cu den e asina yama Memorie van Toelichting ta duna mas detayes di con ‘nan’ a wordo integra den esaki. Noticiacla (ainda) no tabatin aceso na e memorie van toelichting pa analisa esaki. E mandatario a mustra cu ta dificil pa cumpli cu e condicion di CAFt pasobra e lo ta un ‘jump’ mucho grandi y cumpliendo cu e recomendacionan, lo nifica implementa cierto medida cu lo stagnate e mesun economia cu a bin ta recupera cu ta yudando pais Aruba. Y GOA ta ‘sconde’ tras di IMF, cu a bisa cu e situacion enberdad ta manera cu GOA di Aruba ta bisa y ta usa e conseho cu ‘si no tene na cuenta un subida di entrada di un BTW of BBO, Aruba lo por yega na un situacion di un surplus di 2027’. 

GOBIERNO DEN INCUMPLIMENTO TE 2027?

E debate di interpretacion entre GOA  y CAFt a y ta sigui, pasobra e siman aki GOA a argumenta cu 25 miyon ta hopi menos cu algo mas di mil miyon di deficit anterior. Pero e realidad ta keda cu pa CAFt, no por acepta nada cu no ta un surplus. Y CAFt ta bay mas leu. Si gobierno ta bisa cu (usando argumento di IMF den su fabor) ta te 2027 por tin un surplus, CAFt ta interpreta esaki den su ultimo carta pa GOA, cu esaki kier men cu pa no solamente den 2023 lo no cumpli cu e protocol, sino pa e proximo 4 añanan, esta cada aña te cu 2027.