DEN HAAG – Cu vuelo 769 di KLM a yega awe 3 di augustus un cantidad di 62 studiante Arubano pa sigi un estudio avansa na nivel di HBO of Universidad na Hulanda. Esaki ta e di dos y ultimo vuelo cu studiante cu ta yega Hulanda. Ta trata aki di studiantenan cu ta bai studia na Utrecht, Amsterdam, Breda, Tilburg, Den Haag, Delft y Leiden.
Na Schiphol e studiantenan mescos cu tabata e caso ayera a wordo saluda Minister Plenipotenciario Suplente mr. Ady Thijsen. Un biaha mas tabata tin un delegacion consistiendo functionarionan di Departamento di Enseñansa di Arubahuis, studiementor y miembronan di e POC (Plaatselijke Opvangcommissie) presente den sala di yegada di Schiphol.
Mescos cu tabata e caso ayera, a dura bastante largo prome cu e studiantenan por a piki nan maleta pa asina sali pafor di e sala di yegada. Akinan na un forma bon coordina y organisa a haya instruccion di personal di Arubahuis, mentornan y miembronan di e POC con pa cana y unda nan mester a para den grupo pa warda nan turno pa bai na e bus cu lo hiba nan na nan ciudad di estudio. Ariba e di dos dia tanto e programa Leu foi Cas, un ekipo di Telearuba y Roy Kelly di e website Arubiano.eu a haci grabacionnan y a tuma potret di e yegada.
Mayan e grupo aki di studiantenan lo cuminsa cu e programa di “opvang” obligatorio, cual lo dura entre tres dia y un siman. Durante e dianan aki e studiantenan nobo lo haya e guia nesesario den nan ciudad unda pa sigur cuater aña of mas nan lo biba y studia.
E prome aña e studiante ta ricibi guia di e studiementor, pero pa e resto di su estudio e ta cai bou di Arubahuis.
Riba e Facebook pagina di Arubahuis y Onderwijszaken lo tin potret y videonan di e yegada di e grupo di studiantenan.
Nota pa redaccion: E potretnan ta cortesia di Arubahuis
DEN HAAG – Directora di Arubahuis a mr. Joselin Croes a participa na e “Kennismissie” di Minister di OC&W Robbert Dijkgraaf na Curaçao y Aruba. Na Aruba e punto central tabata con educacion ta conecta cu e mercado laboral: e situacion actual, pero principalmente con e demanda di enseñansa ta cuadra cu e necesidad di e mercado laboral.
AMSTERDAM – Rey di Spaña Felipe y Reina Letizia a cuminsa na nan bishita oficial di dos dia na Hulanda. E bishita a cuminsa riba plaza Dam unda cu tabatin tiro di saludo riba e tereno di marina. No a usa municion sino mas bien blanco. E diferencia di e bishita aki ta cu e biaha aki prinses Amalia tambe ta inclui den e bishita. Awe nochi e ta forma parti di e cena Real na honor di e pareha Real Spaño. Amalia tin un relacion special cu Spaña ya cu e la pasa un aña eynan recien debi na motibonan di seguridad pa su bida. Mientrastanto e la bolbe Hulanda pa biba y sigui studia. Pero e situacion di seguridad y menasa contra dje, no a kita ainda.
SCHIPHOL – Decenas di buelo a keda anula dialuna na aeropuerto Schiphol di Hulanda debi na mal tempo. Ta primordialmente buelonan dentro di Europa mes. Buelonan pa Caribe Hulandes manera Aruba no a keda afecta. Ta trata di 90 buelo cu a keda anula, di cual mayoria ta di KLM. Ta spera rafaga di biento fuerte cu posibel mal tempo, segun un vocero di e aeropuerto.
W’STAD/DEN HAAG - Minister Hulandes demishonario di Klima i Energia, Rob Jetten a anunsiá durante un reunion di e komishon fiho di Relashonnan den Reino di parlamento Hulandes ku na 2025 ta organisá e di dos konferensia di klima di reino na Kòrsou. Esaki despues ku e promé konferensia a tuma lugá na mei 2023 na Aruba. El a katalogá e promé konferensia sumamente eksitoso ku partisipashon di diferente pais den region. E ta interesante mirando cu na mei na Aruba Jetten a informa Noticiacla cu e interes pa asuntonan di Clima ta casi nulo, pasobra tin problemanan mas importante cu esey pa atende. Asina mes, ta sigui tene e conferencianan.
DEN HAAG – Negosacionan pa forma gobierno nobo na Hulanda ta continua awe. E lidernan di e 4 partido ta hunto prome biaha cerca e informado. E intencion ta pa logra un acuerdo pa mitar di luna di mei di e aña aki ainda. Pero na final di e combersacion, Geert Wilders di PVV no por a sigura esaki ainda. Partidonan ta hopi positivo pa e progreso, pero ainda no por bisa si ta logra e meta menciona. Algun medio ta bisa cu e combersacionan ta bayendo hopi lento, pero e partidonan ta desmenti esey. E parti financiero ta e parti mas dificil pa atende. Na November di aña pasa tabatin eleccion y a cuminsa negosha. Ya ta bayendo pa 5 luna di formacion.
ORANESTAD - E pasado di sklabitut kolonial di Hulanda i su impakto a forma diferente pais rònt mundu profundamente. Tòg e konosementu ku ta disponibel tokante e pasado di sklabitut kompartí akí ta skirbí partikularmente for di perspektiva kolonial. Pa enrikesé nos perspektiva, minister Dijkgraaf (Enseñansa, Kultura i Siensia) ta inisiá un koperashon global di sientífikonan riba e tópiko akí awe na Aruba. Esei el a anunsiá awe durante un mishon di konosementu den Karibe.