Na Corsou a haña turista perdi den estado avansa di descomposicion

WILLEMSTAD - Despues di 5 dia intenso, outoridatnan a kulminá búskeda di hòmber turista ku tabata pèrdí. Ta trata di un ulandes di fakansi pa un siman ku su famia na Kòrsou. E persona aki tin komo kustumber mainta e ta Sali keiru ku un di e yunan den área di Jeremí. Djamars mainta el a bai pero sin e yu. Ora a pasa i e no a regresá, e famia a bati alarma na polis.

Segun bosero polisial, nan a bai ku e yu ku e sa kana kuné pa mustra e trayekto ku nan sa kana pero no a logra haña e tata. Asina a kuminsá ku e akshon di búskeda i a amplia e área no solamente ku Jeremí pero tambe Kristòfel i tur e área eibanda.

Den oranan di anochi di djasabra último, personanan ku tabata okupando nan mes ku e búskeda di e turista Hulandes den mondi di Jeremi, a sinti un holó fuerte i desagradabel saliendo for di den área di Seru Bientu. Ta trata di e mondi ku ta keda mas den direkshon di Kenepa. Debí ku e área ei tabata bastante sukú kaba, a opta pa para e búskeda i kontinuá e dia siguiente.

Ayera den oranan di mainta tempran e tim forma pa polis, marina, VKC i diferente otro boluntario mas entre nan tambe Park Rangers, a sigui buska den e área for di unda e holó tabata bini. Einan a topa un kurpa sin bida, ku despues a resultá di ta di e hòmber Daniel Dresden nase 13 di aprel 1977 na Hulanda, kende for di djamars último tabata registrá komo pèrdí. E kurpa aki ya tabata den un estado bastante avansá di deskomposishon.

E tim di Reshèrshi Forensiko a hasi nan investigashon na e sitio, miéntras ku dòkter di polis tambe tabata presente. For di investigashon a sali na kla ku no tabatin krímen den e kaso aki. NOTA: Texto ta scirbi den Papiamento fonetico di Corsou.