Premier Wever Croes a reuni cu CAFt na Hulanda riba tema di aanwijzing

ORANJESTAD - Siman pasa Prome Minister Evelyn Wever - Croes a biaha pa Hulanda. E prome reunion cu a atende tabata cu Secretario di Estado Alexandra van Huffelen tocante e pago di 5% bek na empleadonan publico. A pesar cu no a logra convence Hulanda pa e pago por tuma luga, Gobierno a cumpli cu e promesa haci na empleadonan publico y a paga e 5%.

REUNI CU GRADUS

Prome Minister Wever - Croes a reuni tambe cu sr. Raymond Gradus di CAft na Hulanda na Arubahuis. Na e ocasion a papia di e conseho di aanwijzing y locual Aruba ta haciendo pa bin cu cambio na e presupuesto. For di e informacion ricibi, ta mustra cu e aña aki, Aruba lo por entrega presupuesto na tempo despues di hopi aña. E premier a splica na Hulanda e motibo di e tardansa di tur aña y cu e aña aki por tin cambio. Semper manera ta conoci na Aruba, tur aña na mita di aña ta cuminsa prepara pa cambio na presupuesto. Motibo di esaki ta pasobra ora cu traha riba e presupuesto na comienso di aña, ainda no sa kico exactamente ta bay pasa durante di aña. Pero e biaha aki e trabounan a conclui un poco mas trempan, y ta mustra cu e deficit cu tin pa e aña aki (cual ta motibo di conseho pa aanwijzing) por baha considerablemente te casi na mita di locual e tabata, Prome Minister a informa. 

SCUCHA CAFt

Adicionalmente intercambia riba trabounan adicional cu tin cu haci y a scucha opinion di CAFt. Den cuadro di e trabounan aki a realisa un reunion virtual cu Ministernan encarga, pa asina cuminsa tuma e diferente accionnan. 

META PA KITA AANWIJZING

Prome Minister Wever - Croes a expresa cu e reunion a bay bon y e meta ta pa kita e conseho di aanwijzing for di riba mesa. Esaki ta loke a palabra cu Secretario di Estado Alexandra van Huffelen y tambe sr. Raymond Gradus di CAFt.