Encuesta: Implementa ley pa screening pa parlamentario ta prioridad pa votadornan

ORANJESTAD – Implementacion di ley pa screening di  Parlamentarionan, y no solamente minister ta e motibo principal pa cual un persona lo vota den un proximo eleccion parlamentario na Aruba. Den e ultimo encuesta di noticiacla, 11.3% di esnan cu a participa, a selecciona esaki. Y un otro dato interesante, ta cu 40% (reparti entre no y mi no sa) no sa ainda pa ken nan vota den e proximo eleccion. Un total di 1453 persona a participa na e encuesta cu a dura 5 dia y unda cu 59% tabata hende homber. 

PATRONCHI DI VOTA

Segun e datonan compila, 96% a confirma cu nan a participa den e ultimo eleccion, pero ora cu puntra si nan ta bay vota den e proximo eleccion, e cantidad ta baha na 83%, cu 4% bisando cu nan lo no vota y 12% no sa ainda si nan lo vota. Ora cu a puntra entre esnan cu si ta vota, 60% a bisa cu nan sa pa ken nan ta vota, contra 40% (reparti entre no y mi no sa como opcion). Pues aki tin trabou pa bay haci pa convence e 12% pa nan vota, y pa e 40% di esnan cu lo vota, pero no sa ainda pa ken. Interesante ta e edad tambe unda cu e grupo mas grandi cu sa pa ken nan vota y si ta vota, ta entre 45 y 64 aña di edad y e grupo mas grandi ta na Noord y Oranjestad. 

PAKICO MI TIN CU VOTA

E biaha aki a añadi un punto extra, unda cu ta puntra esnan cu a participa na e encuesta kico lo ta e motibo principal e importante pa nan vota den e proximo eleccion. A pone como 13 tema den secuencia no special manera miho enseñansa, tarifa di awa y coriente, y ley mas severo pa caso di pedofiel. Loke a resalta y a haya mayor sosten sinembargo, tabata e opcion’ implementa ley pa screen Parlamentario tambe (y no solamente minister) 11.3%, sigui pa adapta ley pa minister cu e meta pa responsabilisa e minister mas ainda den su funcion) , y sigui pa adapta ley pa responsabilisa un Parlamentario mas ainda, pensando riba e.o. consecuencia ora cu e no presenta na trabou. Esey tabata e prome tres cu a resalta, mas cu ley mas pisa pa pedofiel y otro temanan cu por tabata mas ‘popular’. Esaki ta nifica cu entre esnan encuesta, e preocupacion ta awor mas riba e calidad y trabou di e parlamentarionan y minister, y cu por deduci, cu nan no ta contento cu e forma cu nan ta funcionando, y/of tin cu trece mehoracion serio pa esnan encuesta, vota atrobe. Otro temanan tabata e.o, introduccion di ombudsman, adapta ley pa restzetel, implementa COHO y RAFT, matrimonio mesun sexo y adatapcion di nivel di enseñansa. A duna opcion pa e participante mes yena, y aki tambe tabatin varios. Lo bin bek riba esey den un siguiente raportahe. Un otro tema cu a keda presenta, ta pa cua partido lo vota den e proximo eleccion.