Pompnan di gasoline ta stop di acepta tarheta maestro/debit di banco

ORANJESTAD – Diabierna a keda anuncia cu den nomber di Associacion di Gasolin Stations di Aruba ta notifica comunidad di Aruba cu entrante 13 di juli 2022, nan no lo por ricibi pago mas pa medio di tarheta di Maestro / Debit di banco. Ta trata di un total di 13 pomp di gasoline rond di Aruba.  E operacion di un gas station ta consisti di e benta di gasolin y diesel, na un prijs stipula mensualmente pa Gobierno di Aruba, pa medio di Minister di Economia.

E modelo / formula a base di cual e prijs aki ta wordo calcula ta un modelo di tempo di Lago.cE modelo aki no ta inclui gastonan operacional cu nan ta bin ta enfrenta e ultimo 30 / 40 añanan den mundo di comercio. Por ehempel gastonan di mantencion, bancario, di seguro y aumento obligatorio door di decision di gobierno etc.

Specificamente e gastonan bancario, e asina jama “fees pa swipe cu Maestro / Debito” ta e ultimo druppel cu a causa e decision aki. Cualkier otro negoshi por calcula su gastonan, agrega su margen y asina dicidi riba un prijs di venta na su clientenan.

Den nan caso, esaki no ta posibel, ya cu manera nan ta splica, nan ta traha a base di prijsnan y un margen di ganashi stipula pa Gobierno di Aruba.

Den e prijs calcula pa gobierno aki, tin un margen chikito per liter cu nanta keda cune pa paga nan empleadonan, mantencion di nan stacionnan, seguro y tur otro gastonan operacional cu nan ta enfrenta.

E suma actual pa un gas station ta stipula na 14.5 cent pa liter di gasolin y 12.9 cent pa liter di diesel. Esaki no ta cambia ora cu gobierno ahusta prijs di gasolin of diesel, esaki ta un suma fiho, cu e prijs subi of baha.

Un ehempel, cliente ta presenta cerca nan cu su auto di famia y ta cumpra 100 florin di gasolin, a base di e prijsnan actual, 3.212 florin per liter, 31.133 liter lo wordo bendi na e cliente.

Di e benta di 100 florin, gas station ta keda cu unicamente 4.51 florin pa paga tur su gastonan, salario di empleadonan, pensioen di empleadonan, gastonan bancario, Elmar, Web, Setar, seguro, mantencion etc. Si e cliente paga cu Maestro, banco lo cobra 0.75 florin na comission (0.75% di cada transacion) y e station lo keda cu solamente 3.76 florin pa cubri tur su gastonan. Lo demas di e 100 florin ta wordo paga na gobierno di Aruba, direct of indirect, sea via departamento di impuesto, o via gobierno su compania estatal FMSA cu ta e unico distribuidor di gasolin & diesel na Aruba.

Al mismo tiempo, AGDA tin cu menshona y gradici 2 banco cu pa decadas a sostene ne miembronan. Esakinan ta RBC y CMB. Ambos banco a sostene emiembronan door di no cobra nan e porcentahe na momento cu cliente paga cu un tarheta di Maestro / Debito na estations. Sinembargo, e siman aki CMB a cuminsa cobra un comision riba cada florin cu nos cobra cliente, y RBC tambe lo ta introduciendo esaki.

“Nos miembronan a dicidi di uni nan mes ja cu nos no por sigui asina mas”. Den pasado nan a absorba obligatoriamente hopi gasto y incremento sin tin manera di recupera esakinan den venta. Un comision riba e venta, manera cu banconan lo bai cobra, no ta posibel pa absorba, mirando e subida di prijs di gasolin y diesel, e gasto lo keda subi, paso banco ta cobra un porcentahe di e suma cu  mester cobra cliente, no un porcentahe di nos entrada, ni tampoco un gasto fiho.

Pa e motibo describi aki riba, AGDA a dicidi cu entrante diaranson 13 di juli 2022, e miembronan no lo por tuma carchi di Maestro / Debito mas pa pago na nos gas stations, te ora cu Gobierno di Aruba por incorpora e gastonan adicional aki den nos gastonan di operacion.

Na e clientenan nan disculpa pa e inconveniencia y danki pa e comprencion pa cu esituacion.