Encuesta di noticiacla tabata dividi riba ley di matrimonio di mesun sexo pa Aruba

ORANJESTAD – Segun e ultimo encuesta di Noticiacla na luna di augustus di e aña aki, Aruba tabata dividi riba e tema di matrimonio di mesun sexo. Por lo menos entre e 850 personanan cu a participa den e encuesta. Y entre esnan cu tabata pro pa cambia e ley pa permiti matrimonio di mesun sexo, e grupo mas grandi tabata kier pa esaki sosode pa medio di un referendum. Interesante ta cu den e encuesta aki, e participacion di hende muher tabata mas cu e ser masculino, reparti 54% contra 46%. Un 1% tabata registra como ‘otro’. 

E TEMA

E pregunta haci principalmente, tabata a raiz di e hecho cu dos parlamentario di dos diferente partido politico (ACCION21 y RAIZ) a entrega y cofirma e concepto di ley pa permiti matrimonio di mesun sexo na Aruba. Y noticiacla tabata kier a sa a base di esaki, kico esnan cu a participa na e encuesta, ta pensa. Esta si mester cambia e ley of no, siendo cu ya caba tin ‘geregistreerd partnerschap’, osea union civil. Entre esnan cu a participa, 51% a bisa cu mester cambia e ley, mientras cu 49% ta bisa cu no. 

REFERENDUM

Entre esnan cu ta pro pa cambia e ley, a puntra con mester haci e cambio, y aki 54% a scohe e opcion di referendum pa e cambio tuma lugar, mientras cu 41% a scohe e opcion di cu Parlamento mester vota pa e cambio. Un 5% a bisa cu nan no tin opinion. 

DISCRIMINATORIO OF NO

Di otro banda, ora cu a puntra kico esnan cu a participa na e encuesta ta pensa di e hecho cu Corte Europeo di Derecho Humano no ta considera  geregistreerd Partnerschap como un discriminacion. Esaki pasobra e comunidad LGBTQ si ta considera esaki como un discriminacion. Entre esnan cu a participa 48% no ta considera esaki un discriminacion mientras 31% ta bisa cu si. 12% ta pensa cu ‘kizas’ esaki ta un discriminacion, mientras cu 9% no tin opinion. 

DISCLAIMER 

Manera semper, e resultado di e encuesta aki, tabata pa metanan puro noticioso. Ademas, tambe, no a pretende cu e resultadonan obteni ta un refleho di Aruba completo, sino di usuarionan cu tin aceso na e portal noticiacla. Un total di 850 persona a participa na e encuesta (e mester ta minimal 500 pa por tin un representacion), di cual mayoria tabata hende muher.