Wever Croes: Anuncio di WEB awe mainta a sorprende gobierno

ORANJESTAD – ‘Gobierno a wordo desagradablemente sorprendi, pa e anuncio di WEB awe mainta, sin cu a haya aprobacion di gobierno, mientras nos ta na mesa cu WEB y Elmar riba e tema aki” tabata e prome reaccion di prome minister Evelyn Wever riba e anuncio di aumento di tarifa di awa diahuebs mainta. WEB den un comunicado a anuncia diahuebs mainta cu e tarifa di awa lo conoce un aumento entrante 1 di juli 2022, esta diabierna awor. Esaki a gara hopi hende di sorpresa y awor, -segun e prome mandatario -, e propio gobierno tambe. 

A PIDI PA HISA TARIFA

E mandatario a sigui bisa cu no tabata un secreto cu WEB a pidi caba den pasado pa aumenta e tarifa. Pero e mandatario a recorda cu a bisa cu kier mira di nan banda, cierto trabounan wordo haci. “Nos ta na mesa cu nan, nos a sinta na mesa cu nan e siman aki, prome cu e crisis y e palabracionnan no ta cu awe nan ta Sali anuncia algo asina” e mandatario a sigui bisa. E caso ta den man di e minister di energia Glenbert Croes. Asina cu e mes tin algo di bisa, e lo haci esaki tambe. Ora cu e periodista di 24ora cu a haci e pregunta inicial, a puntra si ta trata di algo di e ley di LNT Landsverordening Normering Topinkomens, e mandatario e la bisa cu e no ta kere cu WEB lo bay haci algo asina pasobra ta cu e ley a pasa.”Mi no ta bay specula riba esey” e mandatario a finalisa bisando.