CAft: Sostenibilidad di debe di Aruba ta rekeri accion inmediato, sino..

ORANJESTAD - “Sostenibilidad di debe di Aruba ta rekeri accion inmediato”. Esey tabata e mensahe principal di e colegio di supervision financiero CAFt diabierna durante nan conferencia di prensa na Aruba. MIentras cu gobierno a sigura cu e reunion cu nan tabatin cu e colegio, tabata uno positivo, e relato cu e colegio a presenta pa prensa, no ta mustra uno positivo. Mas bien a ripiti gran parti di nan keho na gobierno y esaki a keda igual despues di nan reunion cu gobierno e siman aki. Mientrastanto, pa loke ta gobierno, nan a confirma cu a duna gobierno te otro siman diaranson pa reacciona y pa despues e colegio duna nan comentario final. 

UNICO PUNTO POSITIVO

E colegio a confirma cu economia di Aruba ta recuperando prosperamente cu practicamente ta e unico punto positivo den nan relato. Den e lunanan di april y mei turismo a supera e nivel di prome cu pandemia di 2019. Y aki e colegio ta cuminsa cu nan serie di puntonan cu nan kier pa Aruba (lesa:Gobiero:red)  Aruba mester probecha di e periodo di recuperacion aki pa pone su presupuesto na ordo. Nan a sigui insisti cu ta imperativo pa Aruba sigui nan recomendacionnan di   den e presupuesto aproba di 2022, reduci e deficit di financiacion na 2022 y logra un surplus di 1 porciento di e PIB den su presupuesto for di 2023. Reduccion di e debe publico di AWG 5.900 miyon (aproximadamente 104% di e PIB) te na un nivel aceptabel ta sigui ta un tarea importante. Ademas, mester introduci reforma pa garantisa e sistema di seguridad social pa e generacionnan futuro.

SOSTENIBILIDAD DI DEBE

E panorama plurianual, manera presenta den e presupuesto aproba di 2022, ta mustra cu e deficitnan di financiacion lo keda te y cu 2026. Door di esey e debe publico nominal lo sigui aumenta den e proximo añanan. Entretanto interes ta sigui subi y ta preparando refinanciacionnan robusto. Ta esencial pa Aruba reduci su deficitnan, pasobra si no e gastonan di interes ta bira incontrolabel. CAft ta haya necesario cu mester reduci e deficit di financiacion e aña aki mes caba y nan ta insisti cu for di otro aña lo tin un surplus di 1% di e PIB. Tambe sostenibilidad di e debe publico di Aruba ta haci esey necesario. 

PRESUPUESTO 2022 Y 2023

For di april 2022 turismo ta superando e nivel di prome cu pandemia. Cu e recuperacion rapido aki tambe economia ta recuperando prosperamente. Segun e ultimo cifranan, aña pasa economia a crece cu 17,2 porciento. A pesar di esey e presupuesto di 2022 ta mustra un deficit di financiacion di AWG 236 miyon pa e sector publico (4,2 porciento di e PIB). CAft a haci recomendacion na e presupuesto di 2022, cu particularmente ta vigila control di gasto. E gastonan pa bienes y servicio ta aumenta den presupuesto cu 22 porciento en comparacion cu e añanan di prome cu pandemia, mientras cu no ta splica suficientemente e necesidad di e aumento considerabel di gasto aki. E gastonan di personal y e contribucionnan di pais na e empresanan di gobierno tambe ta aumentando innecesariamente. Te ainda no a sigui e recomendacionnan di CAft, y door di esey por lo pronto e deficit di financiacion ta innecesariamente halto e aña aki. 

REFORMA FISCAL

For di 2023 lo implementa un reforma fiscal, di cual introduccion di un IBA (BTW/VAT) ta un parti importante. E entradanan fiscal proveniente di e reforma aki ainda no a keda suficientemente splica den e presupuesto. Consecuentemente, no por determina e grado di realismo di e entradanan fiscal suficientemente. Mester señala cu e proceso legislativo di e introduccion no a cuminsa ainda. E hecho di no alcansa e fecha di introduccion previsto, esta dia 1e. di januari 2023, lo tin un influencia negativo riba e cantidad di entrada fiscal y riba e saldo di financiacion na 2023.

SEGURIDAD SOCIAL Y CUIDO

Reforma den seguridad social y cuido ta necesario pa garantisa sostenibilidad di e sistema pa e generacionnan futuro. Economisacion di AWG 60 miyon den cuido ta un prome paso pa cuido sostenibel y lo mester garantisa cu Pais Aruba no mester contribui a corto plaso pa compensa e deficitnan di AZV. Debi cu ainda no a formalisa introduccion di un contribucion propio y reduccion di e lista positivo di remedi, Aruba ta spera di no alcansa e obhetivo di economisacion aki di AWG 60 miyon na 2022. Sinembargo, ta di gran importancia pa ehecuta e medidanan di economisacion na termino cortico. Un retraso den introduccion di e medidanan aki ta conduci na perdida di economisacion. Den caso di falta di compensacion pa e perdidanan di economisacion aki, e resultado di AZV lo keda afecta negativamente, y cu esey e saldo financiero di Pais Aruba, den caso cu un contribucion nacional ta necesario pa compensa e deficit di AZV.

MANEHO FINANCIERO

Maneho financiero y e ciclo di hustificacion di Aruba no ta na ordo. Elaboracion di e cuentanan anual di 2019 y 2020 a sufri ainda mas tardansa, loke a provoca un retraso konsiderabel. E retrasonan aki ta resultado di deficiencia den e maneho financiero.