Despues di hopi aña, studiante local ta haci solo flight pa bira piloto

ORANJESTAD – Recientemente e instituto di buelo HiDreams Aviation Academy a registra un momento importante. Despues di hopi aña, Aruba ta conoce su prome studiante piloto local cu ta hasi su solo flight. Mr. Gabriel Gomes a cuminsa su trajectoria pa bira un piloto priva na September 2021. E trajectoria aki ta cuminsa cu 6 siman di les di teoria. Despues di e 6 siman di les, Mr. Gomes a bai Florida, USA y a pasa su examen di teoria cu 92%. Cu un examen exitoso e la bolbe Aruba, pa sigui su trajectoria pa asina cuminsa fase 2 di su training, cual cu ta e parti practico. E mester a bula 30 ora pa por a haci su solo flight. Esaki tawata exitoso y asina e por sigui pa su ultimo fase, cual cu ta bai Florida pa ricibi su licencia di piloto.