Oduber: Mester tin un sense of accountability pa e fayo grandi na aeropuerto ayera!

ORANJESTAD – “Loke a sosode no ta correcto y ta algo cu no mag sosode mas” tabata e prome reaccion di e minister encarga cu aeropuerto, Dangui Oduber pa noticiacla diabierna atardi. Manera ta conoci durante e blackout, ningun generator di aeropuerto a traha causando un problema serio di logistica cu ta bay tin un costo pa cual un hende of instancia tin cu bay responde of paga pe. “ Mi a haci preguntanan directo na e CEO pa asina pueblo por haya claridad”, e mandatario a sigui bisa. 

INVESTIGACION

Manera por a spera, lo tin investigacion y no ta descarta cu un of mas cabes lo por cay, si scucha palabranan di e minister. “ Tin investigacionan andando pa determina e causa pero hecho ta cu lo mester tin un sense of “accountibility” pa e fayo grandi aki cu a causa cu 5 vuelo no por a baha na Aruba” Oduber a sigui bisa. Ta conoci cu ora cu buelonan cancela asina, e ta sali basta placa y sigur si e no ta causa di e aeroliña y of mal tempo. E ora e gastonan ‘extra’ ta wordo cobra na un of otro instancia y esaki no ta barata. Ademas, e ta crea un experiencia negativo pa e turista, cu a paga basta placa pa biaha y ta haye ya for di comienso, den un ‘aventura’. “Nos ta depende di turismo y nos mester por garantiza cu nos systema di backup na airport ta funciona na tur momento!” e mandatario a sigui bisa. Pues por tende mas di e situacion aki, unda cu ta sigur cu un of mas persona, lo por bay sinti e cayente di e loke a pasa.