RMR di diabierna a keda posponi, pasobra no ta cla ainda riba e tema di 12.6%

DEN HAAG – E reunion di Conseho di Minister di Reino (RMR) planea pa diabierna (mayan) a keda cancela. Asina noticiacla a compronde di ministerio di Relacionan di Reino. Motibo ta e echo cu ainda e combersacionan ta andando riba e aspecto di recorte salarial di 12.6% y como tal esaki no ta cla pa tuma decision ariba. Como tal a opta pa cancela e reunion te fin di luna. De hecho, inicialmente a planea pa fin di luna tuma e decision final. Aruba y St Maarten tabata di acuerdo, pero awor ta resulta cu Corsou ta e problema, manera cu e portal aki a compronde di su fuentenan gubernamental na Corsou. 

ARUBA

Na Aruba, a crea e impression cu esaki lo tabata un ‘done deal’, y cu e reunion lo tabata mas bien un formalidad, pero ta resulta cu mester di mas combersacion prome cu por dicidi finalmente riba dje. 

CORSOU

Di otro fuente, a compronde cu e problema aki ta Corsou, unda cu tanto Parlamento como gobierno tin problema pa mantene nan recorte intacto, pues cu no kier mantene e recorte di 25% pa e gobernantenan. Un reunion di conseho di minister di diaranson na Corsou a indica e impasse aki cu Hulanda. Y mirando cu Corsou tin e asunto pega, lo a dicidi di pospone e reunion di RMR di mayan.