Candela y huma na IMSAN a causa un evacuacion total di e edificio dialuna mainta

CURA CABAY – Un candela ariba di e camber di operacion di Instututo Medico San Nicolas (IMSAN) a pone cu mester a evacua henter e edificio dialuna mainta. Director Joel Rajnherc a confirma cu e melding a bin pa cuarto pasa di 10, ora cu un posibel corto circuito den e cabel di coriente principal, a pone esaki pega candela y crea huma, cu a domina henter e edificio. E daño mas grandi tabata e huma, cu a penetra pa medio di e ductonan, den practicamente henter e edificio. Tur esaki a pone cu e edificio mester a keda cera pa varios ora, segun e director. Pero ya dialuna atardi, tin mas trankilidad y gran parti di e edificio ta operacional atrobe.

TEST

Segun Rajnherc, esaki tabata un test grandi pa e instituto, unda cu tur hende a mustra cu nan tabata prepara pa algo asina. Asina mes, por lo menos 7 miembro di personal a keda afecta pa e huma y mester a wordo trata pa esaki. Varios pashent, sea den dialyse of den operacion mester a wordo evacua y transporta sea HOH of Medlab pa por a continua cu nan operacion of proceso di dialyse. Tabatin 3 pashent cu tabata den pleno operacion, cu mester a sigui esaki na HOH, y termina esaki exitosamente. Di e tresnan, 2 tabata ainda bezig, mientras cu uno tabata practicamente cla. E operacionan tabata varia di operacion di wowo, uno di barica y uno di un tumor den oksel. Danki na e bon cooperacion di HOH, nan por a tuma e pashentnan necesario pa asina ningun pashent keda afecta pa salud. Mescos ta conta pa e personal. Diamars lo acesora e daño y wak cuanto exactamente esaki ta y con lo haci pa resolve esaki miho posibel.