Premier Rutte ta menasa di retira pa cuestion di mensahenan di su cellular

DEN HAAG – Prome minister di Hulanda Mark Rutte diahuebs a medio menasa cu e ‘ta retira di su funcion, y bay haci algo otro’. E tabata irita durante e debate den Tweede Kamer riba e asunto di ‘delete su mensahenan (sms) di su cellular di marca Nokia, pa falta di suficiente memoria riba su telefon. E corant de Volkskrant a raporta un dia anterior cu e mandatario tabata ‘delete’ mensahenan di su telefon riba propio discrecion y manda loke e tabata kier pa archiva, pa su staf. Algo cu no por segun e corant. A surgi un debate den Tweede Kamer riba e accion aki. Ta partidonan di oposicion mas parti tabatin critica fuerte. Hasta miembronan di coalicion tabatin problema cu esey. 

REACCION RUTTE

Rutte mes a reacciona basta fuerte riba e asunto diahuebs. E prome mandatario a sigura cu e tabata manda su sms relevante nan segun regla pa archiva, y nunca a wanta casonan importante atras of scondi. Pero e mensahenan kita, no por wordo haya bek segun e proveedor di cellular. E tabata hopi irita y ta bisa cu e la actua den e spirito di e ley. “Si Kamer no tin confiansa mas (den mi), mi ta bay haci algo otro” e mandatario a bisa, sugeriendoc u e lo retira e ora ey pa ‘bay haci algo otro’. No ta kere si cu e ta bay recuri na un accion asina drastico si, pero e reaccion a hala hopi atencion si. E ta tilda e miembronan di Kamer di ta actua falso, ora cu nan referi cu e lo ta actuando segun un ‘patronchi’. E ta sigura cu e tin un cuero di olifante, pero a adverti e miembronan cu tin un ‘cambio den norma y balor’ tumando  lugar. E hecho cu e lo ta bruhando e asunto, simplemente no ta berdad.