Ex minister ta ketobay deteni y lo pasa di dos anochi cera

ORANJESTAD – Ex minister Otmar Oduber ta pasa su di dos dia encarcela awe, despues di a keda interoga un biaha mas durante dia. Na final e la keda transporta pa su cel na warda di polis atrobe. E dos dianan reglamentario ta vence mayan diahuebs, y e ora ta wak si ta necesario pa prolonga su detencion cu 8 dia mas. Vocero di Ministerio Publico Ann Angela a confirma pa noticiacla cu diabierna mainta e ta keda presenta dilanti hues comisario atrobe.  Tur cos ta mustra cu esaki lo ta e caso, aunke cu unabez prolonga e detencion, esaki no mester bay 8 dia completo, sino te ora cu landsrecherche ta cla cu e interogacion. Ta conoci cu ta usa strategianan policial pa e detenido cumpli cu e interogacion. Ta alarga cierto detencion, pa asina e presion aumenta riba e detenido y pone papia mas liher. Di otro banda, ta depende di e detenido, si e ta coopera y con e ta maneha e interogacion. Den dos caso separa grandi, e sospechoso principal (ex minister Paul Croes y ex minister Benny Sevinger) a keda deteni mas largo cu tur otro sospechoso den nan respectivo caso. No ta conoci si esaki lo ta mescos, mirando cu Oduber ta e sospechoso principal den e caso aki.