Gremionan comercial preocupa cu forma cu kier introducci BTW

ORANJESTAD – Gremionan comercial manera CUA, ATIA, KvK y AHATA ta preocupa pa cu e introduccion di e asina yama BTW (Belasting over Toegevoegde Waarde). Den un conferencia di prensa e siman aki cada uno a mustra nan area di preocupacion, pero ta comun cu nan preocupacion ta mustra union riba e tereno aki. For di aumento di gasto di producto, peticion pa cambio di fecha di introduccion di BTW, porcentahe mas halto di e BTW pa loke ta inflacion te na keho riba gastonan halto di gobierno, cada uno a mustra nan preocupacion. 

ATIA

E presidente di ATIA Herrick Henriquez tabata preocupa riba e poder di compra cu por bay atras debi cu e productonan ta bira mucho mas caro, y e salarionan no ta subi. 

CUA

Representante di CUA, Francis Saladin, mientras tabata pro pa e introduccion di e BTW, tabata preocupa pa cu e fecha di introduccion di e BTW, solicitando mas tempo pa introduci esaki enbez di hacie na comienso di otro aña. Esaki pasobra ainda Parlamento no a aproba e ley y e cambionan y esaki ta bira un problema. A sugeri cu por lo  menos entre 6 pa 9 luna despues cu e pasa Parlamento, pa e ora pensa riba un introduccion. “Sopi pura ta sali salo” ta e frase cu Saladin a usa. Ademas Saladin ta preocupa cu hendenan lo por aplica e BTW robez, mescos cu ta y a pasa cu BBO na comienso. 

KvK

Pa loke ta e preocupacion di e presidente di Kvk, Monica Kock, e ta mira e parti di e tasa di inflacion cu segun nan calculacion, lo ta ma halto cu esun cu gobierno ta anunciando. Segun Kock, gobierno ta papia di 2.5% mientras cu segun calculacion di KvK, esaki ta 10.5%. Ademas, e introduccion di e cambio ta bay afecta hopi negoshi ‘chikito’, unda cu gobierno lo ta stipulando un salario pa e doño di su propio negoshi chikito. Y mirando cu 70% di e negoshinan registra, ta cay bou di e grupo aki, e lo por ta un reto. 

AHATA

E CEO di AHATA, Tisa LaSorte ta preocupa pa e forma con gobierno kier introduci cambio, pero e mes no ta aplica cambio den su aparato. Segun LaSorte, gobenro no ta inclui den su informacion, con y cuanto gobierbno ta bay corta na gasto. Esaki mirando cu ora cu ta papia di reforma, ta calcula pa yega na un tipo di nivel di entrada pa gobierno, pero segun AHATA, mester baha gasto prome, pa asina baha e peso di impuesto riba nos pueblo. Y finalmente, e anuncio pa aumenta impuesto pa turista, e ta preocupa di e mas caro cu Aruba lo bira cu tur esaki, y cu e por nifica perdida di turismo. Y tambe LaSorte ta preocupa cu no tin un estudio haci cu ta mustra con ta bay yega na esey. Potret cortesia Telearuba.