Consensus durante reunion di IPKO cu mester adapta e concepto actual di COHO

PHILLIPSBURG – Si e reunion siman pasa di IPKO na St Maarten siman pasa a habri cu un realidad cu no tabatin consensus riba e tema di COHO, e reunion a cera diabierna cu un consensus cu mester adapta e ley di COHO, prome cu por implementa esaki. Den e forma actual, simplemente e no ta acceptable, segun e participantenan di COHO. “E contenido di e ley di REino manera presenta na nos, ta na desventaha di e pueblo di Aruba” tabata declaracion di presidente di Parlamento di Aruba Edgard Vrolijk. Mas aleu, miembro di parlamento Shailiny Tromp-Lee a sigura cu e masterplan di Aruba, ta 80% den cumplimento cu e asina yama ‘landenpakket’. Parlamentario Marisol Lopez Tromp ta preocupa cu e speed cu e proceso di reforma ta tumando lugar. Pa loke ta Corsou, e presidente di Parlamento America Francisca a bisa cu Corsou no mester di COHO pa wak si e reformanan ta necesario y cu Corsou mes a pone plannan pa recuperacion di e isla. “Sin COHO, reforma ta bayendo bon caba”. Parlamentario Amerigo Thode ta sigura cu den e forma actual, e ley di COHO no por keda riba mesa. St Maarten no a fiha un posicion riba COHO ainda segun su presidente di Parlamento. E isla tin varios preocupacion pa cu e ley. E pome minister di e isla a laga sa cu e tin problema cu e presion cu ta pone riba nan pa e ley pasa.