Rajnherc: Un fusion entre HOH y IMSAN awor lo nifica fin di IMSAN actualmente

ORANJESTAD – Si bin un fusion awor entre Hospital Horacio Oduber (HOH) y Instituto Medico San Nicolas IMSAN, esaki lo nifica final di IMSAN den su forma actual. Asina e director di IMSAN, drs Joel Rajnherc a bisa durante e programa Noticiacla LIVE e siman aki. Segun e CEO, e situacion actual di e centro medico, no ta permiti un fusion di tuma lugar. Y e ta menciona varios motibo. Entre nan, e structura actual legal cu ta uno cu no ta permiti e fusion di tuma lugar, sin mas. Pa esey cambia, mester bin intermediacion Parlamentario, pa e.o. cambia e status Sui Generis, pa cuminsa. 

RESISTENCIA

E CEO a admiti cu e ta e prome pa resisti contra e fusion aki. Y gran parti tin di haber cu e situacion gerencial, unda cu e dos gerencianan (HOH y IMSAN) no ta riba e mesun liña, no ta actua mescos y aki ta unda cu e problema mas grandi personal pa Rajnherc ta actualmente. E relacion entre HOH y IMSAN ta ‘ok’, pero no suficiente pa un fusion. E forma con ambos ta pensa ta diferente y no riba e mesun liña. Ego’s tambe ta un parti sigur cu ta hunga un rol. Dia cu e forma di traha, y pensa cambia, e ora por cuminsa pensa riba un fusion. Pero pa aworaki, esey no ta e caso segun Rajnherc. 

LEGAL, FINANCIERO Y ACREDITACION

E parti legal sigur ta un aspecto cu ta stroba cualkier fusion. Esaki pasobra IMSAN ta un Sui Generis y Hospital no. Segun e ley pa cual IMSAN ta funciona, mester cuminsa na cambia esaki y esey ta Parlamento tin cu haci. Ademas, tin un aspecto financiero, unda cu IMSAN ta pagando un prestamo bek, sin ningun problema y esey lo bira un issue ora di un fusion. Y finalmente, IMSAN ta den proceso pa keda cla cu su acreditacion cu JCI. Ta premira cu esaki lo mester keda cla pa fin di e aña aki. Y ora cu bo tin un instituto acredita, e no por drenta un fusion cu un instituto (HOH) cu no ta acredita.