Aruba no ta cla pa mengua aumento di tarifa di gasolin mescos cu otro islanan

ORANJESTAD – Contrario na otro islanan di Reino Hulandes, Aruba no tin plania ‘ainda’ pa mengua e efecto di aumento di prijs di productonan petrolero cu por spera e siman aki. Asina prome minister Evelyn Wever Croes a contesta un pregunta di periodista di 24ora.com durante on conferencia di prensa dialuna mainta. E pregunta tabata a raiz di e accion di otro islanan manera Corsou y Bonaire (y propio pais Hulanda) unda cu nan a sea baha e accijns riba e productonan petrolero, pa asina wanta e tarifanan mas economico posibel. Esaki mirando cu esaki ta pensa pa subi debi na e efectonan di guera entre Ucrania y Rusia actualmente. Segun Wever, gobierno di Aruba ta pendiente un conseho di e colegio di supervision financiero CAft, riba e tema aki. Esaki pasobra den pasado caba CAft a ‘straf’ Aruba ora cu e la tuma cierto medida pa baha gasto, manera reduci loonbelasting aña pasa. Door di haci esaki, Aruba a perde ‘8 miyon’ na entrada, cu a pone cu ora cu a pidi mas placa, CAft a mustra cu Aruba no ta haya mas, pasobra no mester a reduci loonbelasting.