Fiscal ta nenga abogadonan cierto documentonan den caso Avestruz

ORANJESTAD – Awe mainta e caso penal conoci como Avestruz, cu como sospechoso principal, ex minister Benny Sevinger a continua. Aki e abogadonan di tur sospechoso  tabata presente pa scucha e reaccion di Fiscal riba nan peticionnan. Y manera por a spera, abogadonan a reacciona riba fiscal. 

NO TA CONTRA

Fiscal a cuminsa na bisa Hues cu Ministerio Publico en principio, no ta contra pa scucha testigonan. Aki abogadonan a pidi pa haya cierto informaicon. Pero aki ta unda cu Fscal a bay contra indicando cu nan ta haya cu esaki no ta algo relevante y pesey ta opone. Esey ta nifica tambe cu Fiscal no ta entrega documentonan solicita cu ta contene declaracionan di Sevinger haci na landsrecherche durante su interogacionan. Abogadonan kier a usa e info ey pa mustra cu e loke ta sosode, no ta nada diferente ni illegal ora cu ta trata proceso di tereno. 

PROHIBI CONTACTO

E prohibicion di Fiscal pa cierto sospechoso tin contacto cu algun persona, a keda revoca, pues esey ta nifica cu sospechosonan por tin contacto cu cierto personanan sin cu esaki tin efecto riba nan caso. Esey por inclui posiblemente, acusado papia cu otro acusado. 

TESTIGO

Fiscal tambe a sugeri pa e forma di interoga testigo, esaki sosode cerca Hues Comisario y no den Corte durante tratamento di e caso, pasobra ‘esaki lo haci e proceso mas facil’. Ademas, Fiscal ta pensa cu e hecho pa scucha abogasdo como testigo di algun acusado, ta kere cu ta bay usa derecho di silencio di profesion y como tal no ta haya cu esaki mester ta posibel y of necesario. Di otro banda, a bay di acuerdo pa entrega administracionan confisca bek na e sospechosonan. 

REACCION ABOGADO

Manera por a spera, abogadonan despues na nan turno a reacciona riba puntonan treci dilanti di e Fiscal. Entre nan, tabata abogado Rudi Oomen, cu ta abogado pa e.o. E. Biemans y Werleman, cu ta haya cu abogadonan mes mester dicidi si nan kier wordo interoga y mester por yama abogado pa tal, y laga nan mes dicidi pa nan mes. Ademas a bisa hues cu un abogado tin derecho y no obligacion pa loke ta silencio di profesion. Ademas Oomen a bisa hues cu mester duna abogado e chens pa durante interogacion di testigo, haci pregunta. Otro abogado, sra D . Canwood a reclama pakico no a permiti pa scucha algun di su testigonan, cu e ta haya ta hopi importante. Abogado Carlo a indica dado momento cu si enberdad e investigacion ta cera manera cu Fiscal ta bisa, cu e ora mester debolbe tur cos bek loke a keda confisca. Y finalmente, abogado David Kock tabata kier sa di hues pa ki tempo e por haya e administracion y documentacion di su clientenan bek. Hues a cera e tratamento y lo   duna su veredicto mayan mainta riba tur e peticionan.