Aduana di Aruba ta ricibi ayudo di Aduana Hulandes relaciona cu Landspakket

ORANJESTAD - Aduana di Aruba ta ricibi ayudo di Aduana Hulandes relaciona cu  Landspakket. Asina gobierno di Aruba a informa diaranson. Esaki ta kita e speculacion cu tabata mira douaneronan Hulandes constantemente drentando Cocolishi recientemente. Pero segun e mandatario responsabel pa e departamento, Xiomara Maduro, nan a haya bishita di Aduana di Hulanda den persona di sr. Bert de Haas y sr. Otto de Vries cu tabata compaña pa sr. Croes y sra. Cabenda di Aduana Aruba. Den cuadro di e acuerdo cu Hulanda manera stipula den punto H11 di e Landspakket, Aduana Hulandes lo bay brinda sosten y cooperacion na Aduana di Aruba pa e trabounan necesario pa reforsa seguridad di nos frontera. E meta di e bishita di Aduana Hulandes e biaha aki tabata pa cera conoci cu e organisacion di Aduana di Aruba y inventarisa e necesidad pa sosten y cooperacion cu Aduana Hulandes lo por brinda. Como parti di e cooperacion, lo planifica tambe un bishita pa Aduana na Hulanda pa asina e Aduaneronan di Aruba por mira di cerca e procesonan cu lo por wordo aplica na Aruba tambe. Den e cooperacion aki lo enfoca, entre otro, riba e maneho di risico pa e control door di Aduana.