Aruba a aplica sanccion riba 7 di e 10 avionan Ruso registra localmente

ORANJESTAD – Gobierno di Aruba (lesa: minister Ursell Arends) a sanciona por lo menos 7 avion Ruso, conforme e maneho contra e guera entre Rusia y Ucrania. Noticiacla tabata un di e prome medionan cu a raporta riba posibel sancionan cu por eherce contra e.o. Avionan cu ta registra na Aruba. Recientemente e mandatario a confirma cu tin por lo menos 10 avion Ruso registra na Aruba. Awor, di e 10 avionan ey, 7 a keda sanciona. “Mi encargo como minister di transporte ta inclui luchtvaart y mi ta ser manteni na altura diariamente door di Directie Luchtvaart di e efectonan cu e agresion militar di Rusia contra di Ukraina tin pa Aruba” e mandatario a sigui bisa diabierna mainta.

SANCIONAN

Manera ta conoci, varios pais - entre otro Merca, Reino Unido y Union Europeo - a emiti sanccionnan en conexion cu e situacion aki. E sanccionan aki ta regarda diferente area; financiero, maritimo, diplomatico pero tambe pa loke ta aviacion. Na Aruba, mescos cu otro paisnan, ta evaluando e aplicabilidad di cada sanccion y ta integrando esaki den nos leynan. Esaki a base di e sanccionnan di Union Europeo, cu Aruba ta siguiendo. A base di esaki a tuma e paso pa cera espacio aereo pa tur avion cu ta propiedad di of cu ta wordo dirigi pa un persona of compania Ruso. “ Ademas di esey, Directie Luchtvaart a cuminsa tambe cu implementacion di e sancionnan y a cuminsa aplica esaki riba un total di 7 avion. Esaki ta encera de-registro of grounding di e avion, dependiendo di e sanccionan” e comunicado ta sigui bisa.“Comunidad di Aruba por ta sigur cu hunto cu Directie Luchtvaart mi lo sigui monitorea e sanccionnan di cerca. E sanccionnan ta wordo adapta regularmente, y nos lo percura pa Aruba aplica esakinan debidamente” e mandatario ta finalisa bisando. Potret cortesia di J.P. Gosselin