WEB: Situacion di coriente a bira instabil atrobe na Aruba

ORANJESTAD – Despues cu a raporta inicialmente door di WEB cu e situacion ta 95% remedia pa loke ta suministro di coriente, esaki a bolbe cambia. Tabata pa algo prome cu 5’or (4:51 PM) cu WEB a confirma cu e situacion di coriente tabata instabil atrobe tanto na N.V. ELMAR como na WEB. “Esaki ta pone cu cierto area cu a haya coriente atrobe a experencia un interupcion. Nos ta trahando duro pa recupera” tabata e palabra di vocero di WEB, Asja Dongen un rato pasa. “Un biaha mas nos disculpa pa e inconveniencia”.

ELMAR

Tabata Elmar cu un ora prome caba, a cuminsa alerta districto y barionan di e situacion ‘nobo’. “ (E) situacion di coriente ta keda poco delicado y debi na esaki mester a saca algun area bek for di servicio” Elmar a pone riba nan pagina di Facebook. “Areanan cu ta afecta ta entre otro: Shaba, Tanki Leendert, Seroe Janchi, Matadera, Sabana Liber, Montanja, Seroe Lopes, Piedra Plat, Cumana, Seroe Biento, Catiri, Moko, Jaburibari, Bloemond, Nune, Papaya. Areanan cu tambe ta sin coriente ta Savaneta, San Nicolas y Palm Beach un parti” nan a sigui bisa, y cu nan ta sigui informa. Esaki ta un noticia den progreso.