Peloteronan professional a cuminsa raporta pa springtraining awor

FORT MYERS – Awor cu Major League Baseball y e asosacion di peloteronan professional a yega na un acuerdo porfin, e temporada di baseball professional 2022 por cuminsa. Cu esaki, e peloteronan professional di Aruba manera Xander Bogaerts y Chadwick Tromp a biaha caba pa Merca pa raporta na nan respectivo ekiponan. Bogaerts a yega Fort Myers unda cu e tinc u raporta prome cu diadomingo cu su ekipo Boston Red Sox. Nunca antes e peloteronan menciona a keda Aruba asina largo na inicio di aña, ya cu for di final di januari nan tabata biaha bek pa Merca. Pero e biaha aki como cu cos tabata mal pega, nan ‘vacantie’ a extende mas. Esey no ta nifica cu nan no a tene nan mes den condicion durante e temporada aki. 

SPRING TRAINING

E fecha pa raporta oficialmente tabata diadomingo, mientras cu e weganan tabata poni pa cuminsa tentativamente 18 di maart proximo. Esey ta nifica tambe cu e weganan oficial (e temporada nobo) ta cuminsa mas lat cu normal, y ta poni awor pa inicia dia 7 di April envez di 31 di maart. E weganan cu a bay ‘perdi’ lo wordo hunga na final di e temporada den forma di double headers. Tin varios cambio tambe pa loke ta e formato di playoff na final di e temporada. Pero esaki lo keda anuncia despues. NOTA: Potret di Xander Bogaerts yegando springtraining ta cortesia di 297 sports.