Encuesta: Gabinete Wever Croes II su prome 100 dia ta malo!

ORANJESTAD – Gabinete Wever Croes II a haci un mal trabou durante su prome 100 dianan. Esaki ta e resultado general di e encuesta cu noticiacla.com a tene siman pasa riba e tema aki. E preguntanan tabata simple, y dirigi rond di e hecho cu aki dos siman e gabinete ta cumpli su prome 100 dia den gobernacion. Esnan cu a participa, mester a bisa con e gabinete a traha, y tambe con cada minister a traha. Un total di 1196 persona a participa activamente, di cual mayoria tabata hende homber. 

RESULTADO

E forma con e encuesta aki tabata hinca den otro ta cu por a ‘huzga’ e gabinete prome, usando hopi bon (4), bon (3), malo (2), hopi malo  (1) y ‘mi no sa’. Pa e proposito aki a usa e prome 4nan menciona principalmente. Unabez tabula, ta coi e average pa determina den un forma husto, con cada pregunta a presenta. 

PATRONCHI DI VOTO

Loke ta resalta inicialmente ta e patronchi di voto unda cu di e 1133 persona cu a contesta e pregunta di si nan a vota den e eleccion recien, 95% a bisa cu Si, mientras cu 5% a bisa cu no. A puntra tambe si e persona cu a participa na e encuesta, a vota pa e partidonan di coalicion, esta MEP y RAIZ, 1093 a contesta e pregunta aki unda cu 60% a bisa cu Si, mientras cu 40% a bisa cu no. Pues por deduci di e resultado aki, cu (entre esnan cu a participa den e encuesta aki), e average mas grandi (si conta malo y mas malo hunto ta yega 60%) no ta contento con nan partido a haci, y cu nan por ta defrauda y a demonstra esaki den e resultado. 

GABINETE

Riba e pregunta con gabinete Wever Croes II a traha, como gabinete, tabata caba un señal cu cos no tabata bon. For di esaki, gobierno a haya un average di 2.1, cu ta cay den categoria ‘malo’, pero toch cu un indicacion ariba. Esey kier men cu e opcion cu ta keda registra den e caso aki, ta cu un grupo mas grandi a scohe entre malo y hopi malo, cu a pone e resultado sali asina. 

MINISTERNAN

Entre ministernan tambe un grupo mas grandi a scohe entre malo y mas malo, unda cu solamente 2 minister a haya un average ‘positivo’ ora cu rond af ariba. Tur otro a haya malo, ni maske bo rond af ariba, y aki un minister ta sali di ‘bon’, ya cu realmente e ta cay den ‘hopi malo’ pero ora cu rond e af ariba e tambe ta haya un 2.  Esaki ta e siguiente puntacion pa e ministernan respectivo cuminsando cu e minister cu a haya mas miho puntacion average te na e ultimo: 

Minister Dangui Oduber.              3   (2.8)

Minister Rocco Tjon                     3   (2.6)

Minister Geoffrey Wever.             2   (2.4)

Minister Endy Croes                    2    (2.3)

Premier Evelyn Wever Croes      2    (2.2)

Minister Xiomara Maduro            2    (2.2)

Minister Ursell Arends                 2    (2.0)

Minister Glenbert Croes              2    (1.9)

Esey kier men cu si mira e puntuacion, e minister cu a traha miho segun esnan cu a participa den e encuesta, ta minister Dangui Oduber y Rocco Tjon, mientras cu e minister cu segun esnan cu a participa, a traha mas malo den e prome 100 dianan di Gabinete Wever II ta ministernan Ursell Arends y Glenbert Croes. 

MI NO SA

Loke tambe ta resalta, y por interpreta esaki den e popularidad di e respectivo minister, esun cu esnan cu a participa tabatin mas problema pa ‘rate’, tabata minister Geoffrey Wever cu a haya 21% di e votonan na ‘mi no sa’, sigui pa minister Rocco Tjon, . Por interpreta esaki cu sea no tin interes den e minister, of cu e no tabata suficiente den noticia activo pa hende por husga. Noticiacla mester clarifica mesora tambe cu mientras cu mayoria di minister ta activo (incluyendo esnan cu aki no a sali popular) y ta manda yen di comunicado di tur nan bishitanan diario, logronan diario, no ta nos practica di activamente publica trabounan di minister, pasobra ta considera esaki mas bien PR y no noticia,  pero ta publica raportahe respectivo e minister ora cu e ta den noticia pa un of otro tema cu ta actual den noticia. 

DISCLAIMER 

Un total di 1196 persona a participa activamente na e encuesta digital aki durante 5 dia, di cual mayoria tabata hende homber.  Noticiacla manera semper, no ta pretende cu su encuestanan ta representa henter e isla, ni cu tur hende tabatin acceso, mirando cu esaki tabata un encuesta electronico, pues cu no tur hende tin acceso na esaki.   Asina mes, e ta un indicacion interesante entre usuarionan di Noticiacla y ta genera material suficiente pa tene na consideracion.