Famia Ling a lansa buki: Ling Legacy, A Journey of Family, Food and One Happy Island
ORANJESTAD - Diabierna atardi 9 di juli, famia Ling hunto cu un grupo chikito di invitado a reuni pa lansa e buki; LING LEGACY A JOURNEY OF FAMILY, FOOD AND ONE HAPPY ISLAND.
Sharlene Starke yiu muher di Yolanda Ling q.e.p.d. a conta di e origen di e buki y di e fundacion; Jordan Ling Foundation na cual tur fondo recauda por medio di benta di e buki lo bay.
“E idea pa scirbi y publica e buki a nace serca mi tanta Sra. Ingrid Ling casa di mi tio Clifton. E intencion tawata prome pa haci’e un publicacion priva pa famia, pa e keda como un recuerdo pa tur miembro di famia cu ta of tabata parti di e legado di e famia Ling, pues un family book,” Sharlene a conta.
Sin embargo na 2015 mientras cu Sra. Ingrid tawata bezig cu e draft, e famia a ser enfrenta cu un dolor devastador. Su primo Jordan, you di Clifton y Ingrid lamentablemente a tuma su mesun bida a consequencia di su sufrimento di deficiencia mental. Asina na 2016 a lanta “The Jordan Ling Foundation” pa promove actividadnan relaciona cu Salud Mental. E meta principal ta pa yuda mas tanto posibel promove cuido di personanan cu ta sufri di Salud Mental aki na Aruba.
Despues Sr. Clifton Ling kende hunto cu su rumanan a tuma over e negoshi di su mayornan a conta di e historia di yegada di su famia for di China na Aruba na 1930. Tawata durante di e decada 1920 cu China tawata un republica nobo, despues di 2000 anja di dominio imperial. E pais tawata enfrentando enorme retonan cu nan economia, politica y bida social. China a keda devasta pa un guerra civil entre Kum Ming Tong (KMT) encabesa pa Chang Kai Shek y e Partido comunista Chines (CCP) bow mando di Mao Zhe Dong, cual doctrina a prevalece te cu awe. Segun e censo di e tempo ei China tawata conta cu un población di solamente mei million habitante. Den e decada ey China a conoce un periodo di hambruna causa pa chaos politico y un secura immenso. “Mi Papa a nace den e aldea chiquito di Leelong cu awe ta un bario di e metropolis Shenzhen, e cuidad fronterizo entre Hong Kong y China. Siendo e yiu mayor di un famia di 10 yiu e tawata esun cu a wordu encarga pa haci e biahe pa exterior cu e speranza pa un logra miho futuro, asina el a descubri Aruba.
Sr. Clifton Ling a sigui conta durante di su discurso cu e caminda pa realisa e buki tawata basta turbulento pa motibo di e tragedia di nan yiu homber menor Jordan, pa kende nan ta dedica e obra di e buki y tambe pa e fundacion bow su nomber. Un danki ta bay na nos yiu homber Dustin y su grupo di amistad di Caribe Hulandes biba na New York - Big Apple cu a establece contacto cu e editor y publicista Willy Wong cu tabata tin gran conocimento di e material y acceso na e archivonan universitario den e region. Asina nos por a compila e historia di mi grandinan, e viahe, e documentonan y potretnan cu ta sychroniza cu e texto skirbi den e buki. E ta simplemente un storia di un imigrante cu kier a buska su futuro sin conocimento kiko esaki lo trece den un mundo nobo aki na otro banda di e laman immenso.
Un danki special ta bay na tur personanan y instancianan cu a contribui den cualkier forma cu por a conduci den e logro aki awe. Manera mi a menciona prome, e buki ta dedica na JLF y e fondonan recauda aki ta bai pa e fundacion. E prome ehemplar di e buki a ser entrega na director di Archivo Nacional Sr. Raymond Hernandez, e bukinan lo ta obtenibel den librerianan local. Nos ta spera cu e comunidad di Aruba les’e y goza di dje!
Dia Internacional di Mama Tera 2024: Cambia e direccion di pensamento y inclui bienestar di e planeta den nos bida diario
ORANJESTAD - E asamblea general di Nacionnan Uni a proclama 22 di april como Dia Internacional di Mama Tera. Esaki, nan a haci’e pa medio di un resolucion firma na 2009. E fecha aki ta reconoce e ecosistemanan di e planeta Tera, cu ta e luga di biba di humanidad y cu mester di proteccion pa asina engrandece hende su bienestar, combati cambio di clima y tambe stop e biodiversidad di bay perdi. Aki na Aruba DNM tambe ta reconoce e urgencia pa haci mas y duna un voz na e naturalesa, Mama Tera.
AZV: Otro luna tin traspaso automatico di clientenan di dokter Vink pa HOED Piedra Plat
Grupo grandi di ex studiante tin problema pa paga nan Duo lening bek
ORANJESTAD – Mas cu mitar di studiantenan local (Aruba) cu a studia usando e prestamo escolar ‘Dienst Uitvoering Onderwijs voor studenten en scholieren’, conoci como DUO, tin problema pa paga esaki bek , ta paga menos cu nan mester paga, of mas pio, no ta paga nada bek mes. E grupo aki ta sigui ta un problema segun representante di DUO, Marit Verbogt manera cu e la splica diahuebs den e programa Noticiacla LIVE. Si tin mas of menos 4000 ex studiante cu tin cu paga bek, y ta algo di mas di mitar tin e problema, por deduci cu e cantidad aki ta mas cu 2 mil studiante local. Verbogt ta splica kico e situacion ta, den e video adhunto. E siman aki e representantenan ta na Aruba te cu otro siman diabierna pa atende cu e grupo aki y tambe studiantenan cu kier un beca via DUO. Nan por acudi na e centro John F Kennedy durante oranan specifico cu ta ubica riba e pagina di FB di nan y tambe e portal di DUO.
DVG: A cuminsa hospitalisa hende localmente infecta cu Dengue
ORANJESTAD – E situacion di Dengue na Aruba ta birando mas alarmante. Diahuebs Departamento di Salud Publico a informa cu a cuminsa hospitalisa hende cu ta infecta cu Dengue. Ta trata di 2 persona. Un di e personanan aki ta bek na cas, y e otro ta sigui interna cu complicacionnan serio debi na Dengue. Por a verifica cu ningun di e personanan aki a biaha recientemente, indicando cu ta trata aki di dos caso di Dengue di transmision local. DVG ta informa tambe cu ta observando mas caso cu ta di spera – of cu ta normal – pa e temporada aki.
Conocido ciudadano y ex director di KIA Ben King a haya despedida impresionante
DEA: Cabesante y docentenan ta sigui prepara pa introduci Papiamento na scolnan basico
ORANJESTAD - Entrante augustus 2024 e alumno di klas 1 lo siña lesa y skirbi na Papiamento. A organisa un trayecto di preparacion pa asina ekipa e cabesante y e maestro di klas 1 di scolnan basico (basisschool) cu e hermentnan necesario pa por implementa e parti aki di e maneho nobo di idioma den scol.
Follow NoticiaCla
